Janë zbardhur detaje të reja nga atentati i regjistruar në orët e para të mëngjesit të së dielës në Vlorë, ku u ekzekutua 58-vjeçari Renato Hoxhaj.
Grupi hetimor beson se autori i dyshuar, i cili është filmuar nga një kamer sigurie pranë vendit ku ndodhi vrasja, dyshohet se ka vendosur një bark artificial, si dhe në gjithë kokën një maskë silikoni. Veç tyre, ai kishte vendosur edhe një kapele, si dhe një maskë tjetër para fytyrës.
Këto veprime ishin bërë nga ana e tij me qëllimin për t’u kamufluar që ta bënte të vështirë identifikimin nga Policia, edhe nëse filmohej nga kamerat e sigurisë.
Dyshohet se pasi ka kryer krimin, vrasësi është larguar drejt Greqisë përmes kufirit të gjelbër.
Në lidhje me këtë atentat, ditën e djeshme Policia ndaloi në Tiranë shtetasin Eris Mehmetaj, i cili është me origjinë nga Tropoja, teksa njihet dhe si mik i Roan Brahimit alias Sidorel Prendit, i ekzekutuar në Maj të vitit të kaluar në Athinë, i cili strehohej në Dubai.
Ai është ndaluar nga uniformat blu, pas identifikimit nga Policia e Vlorës të automjetit me të cilin ka lëvizur vrasësi ditën e krimit. Nga hetimi ka rezultuar se Mehmetaj ia ka dhënë automjetin para krimit autorit, teksa mjetit më pas i ishin ndërruar edhe targat.
Eris Mehmetaj i është sekuestruar edhe celulari, nga i cili grupi hetimor beson se do të marrë të dhëna që mund ta ndihmojnë për zbardhjen e vrasjes së Renato Hoxhaj.
Grupi hetimor dyshon se vrasja e 58-vjeçarit është porositur nga Dubai, nga një grup kriminal nga Vlora, nën dyshimet se ai mund të ketë qenë informator për grupin kundërshtar.
