Ilir Meta, i cili garon në listën e hapur të opozitës në Qarkun e Tiranës, në një intervistë për A2 CNN ka treguar se si arrin të bëjë fushatë nga qelia e burgut, ku ndodhet prej tetorit të vitit të kaluar.
Meta tha se fushat po i ecën me ritme të shkëlqyera dhe se dërgon nga 80 deri në 150 letra në ditë, teksa synon që në javën e fundit të fushatës të arrijë deri në 200 letra në ditë.
Ai u shpreh i sigurt se Partia e Lirisë do të marrë 12 mandate të sajat në zgjedhjet e 11 majit, teksa 4 prej tyre i ka në listat e mbyllura.
Presidenti i Partisë së Lirisë tha që është i sigurt se forca politike që ai drejton do të marrë 12 mandate të sajat në zgjedhjet e 11 majit, pavarësisht se ai vetë ndodhet në qeli prej tetorit të vitit të kaluar.
“Fushata ime ecën me ritme të shkëlqyera, nga 80-150 letra në ditë. Ajo filloi me 50-100 letra në ditë dhe do të përfundojë me 200 letra në ditë besoj. Po kështu jam I bindur se Partia e Lirisë ecën e sigurt drejt 12 mandateve të saj (4+8). Unë u rrëmbeva në 21 tetor në mënyrë banditeske, siç u rrëmbye Aldo Moro në Itali nga brigadat terroriste, pikërisht për shkak të 11 majit, që Rama të grabisë 1 mandat të katërt, por gjërat kanë ndryshuar shumë që atëherë.
Njerëzit e Partisë së Lirisë, kudo po punojnë në terren dhe më mirë se një pjesë e strukturave. Jam çdo ditë në kontakt me dhjetëra e qindra prej tyre. Që nga momenti i shpalljes së emrit në listat e hapura, dita ime ka ndryshuar shumë. Pasi prioriteti Nr. 1 është leximi i letrave që vijnë dhe shkrimi i letrave për bashkëpunëtorët, anëtarët e Partisë së Lirisë, por edhe shokët e miqtë që nga fëmijëria, shkolla, gjimnazi, universiteti, sporti etj”, tha Meta.
Kreu i Partisë së Lirisë tha se koalicioni Shqipëria Madhështore ka nevojë për 84 mandate për të ndryshuar kodin zgjedhor që të zhdukin listat e mbyllura.
“Duam 84 mandate që të zhdukim listat e mbyllura që solli Edi Rama pa Edi Ramën. Se për të qeverisur do të na mjaftonin 71 mandate që janë të padiskutueshme. Nëse Edi Rama do i besonte sondazhet që porosit vetë, apo do e kishte lojën nën kontroll të plotë, si në 2021 kur kishte të kapur përmes McGonigal dhe McGonigal-es dhe kryetarin e PD do kandidonte i 18 ose 19 në Tiranë siç kandidoi i 8 në Durrës kur kishte qepur çdo gjë jo vetëm me bandat por edhe me Lulin që pranoi vonimin e numërimit derisa LSI të “humbiste” mandatin për 90 vota. Edi Rama po shkon drejt një katastrofe edhe pse kjo është një garë e jona me një shtet mafioz të kapur totalisht prej tij” – tha Meta.
