Gjykata e Posaçme Kundër Korrupsionit dhe Krimit të Organizuar (GJKKO) shtyu për sot vendimin mbi dërgimin ose jo në gjykim të çështjes ndaj ish-kryeministrit Berisha.
Avokati i ish-kryeministrit Sali Berisha, Genc Gjokutaj, reagoi dje pas vendimit teksa u shpreh se gjykata ka rrëzuar të gjitha kërkesat e ngritura nga mbrojtja gjatë seancave paraprake, përfshirë edhe ato që lidhen me pavlefshmërinë e ekspertizës.
“Gjykata ka rrëzuar të gjitha kërkesat tona, përfshirë pavlefshmërinë e ekspertëve. Kemi kërkuar një kohë të shkurtër për t’u konsultuar për këtë vendimmarrje që e konsiderojmë të paligjshme. Nesër do të mësojmë nëse çështja do të kalojë për gjykim të themelit”, – u shpreh Gjokutaj. Ai theksoi se nuk ka ende qartësi lidhur me vendimin dhe se do të konsultohet me ekipin ligjor për të vendosur për hapat e mëtejshëm. “Kemi vepruar në përputhje me Kodin e Procedurës Penale. Vendimi nuk është i qartë dhe do të na duhet ta analizojmë para se të ndërmarrim veprime të tjera”, – deklaroi avokati Gjokutaj.
