Autoritetet në Kosovë kanë zbardhur atentatin e regjistruar mbrëmjen e 1 Prillit, ku u ekzekutua efektivi i Policisë, Muhamed Lika. Ai u qëllua me armë zjarri rreth orës 23:00, në hyrje të banesës së tij, në rrugën “Idriz Seferi”.
Të 7 personat të dyshuar si të përfshirë në krim janë arrestuar nga Policia e Kosovës, teksa akuzohen për “planifikimin dhe kryerjen e vrasjes” së efektivitMuhamed Lika, e cila sipas autoriteve dyshohet se është krye për motive që ndërlidhen me punën e tij zyrtare.
Një nga personat kyç të arrestuar është 18-vjeçari Rejhan Bela, i cili sipas hetimeve, dyshohet si ekzekutori kryesor i policit Muhamed Lika. Në momentin e kryerjes së krimit, Rejhan Bela ishte vetëm 17 vjeç, por dyshimet janë se vrasja mund të jetë kryer me paramendim dhe si pjesë e planifikimeve të këtij grupi të rrezikshëm. Ai është djali i një ish-polici.
Në pranga janë vënë dhe shtetasi Haki Bela i lindur më 1999, Rilind Murati i lindur më 2003, si dhe shtetasi Fatmir B. Mes 7 të arrestuarve është edhe një ish-ushtar i Forcave Speciale të Kosovës.
“Dyshimet e tona të deritanishme janë se vrasja e rreshterit tonë ka ndodhur për shkak të detyrës së tij zyrtare. Megjithatë, motivet do të qartësohen edhe pas intervistimit të personave të dyshimtë dhe pas ekzaminimit të dëshmive të gjetura. Kjo mbetet të vërtetohet”, tha për mediat drejtori i Policisë së Kosovës, Gazmend Hoxha.
Sipas kryepolicit në Kamëz disa prej tyre kanë të kaluar kriminale dhe se Muhamed Lika kishte punuar në zgjidhjen e disa rasteve ku ata dyshoheshin për vepra penale.
“Disa nga të arrestuarit kanë pasur të kaluar kriminale dhe kanë qenë të arrestuar në të kaluarën për raste në lidhje me prirje ekstremiste”, tha Hoxha.
Arma me të cilën është kryer vrasja nuk është gjetur ende. Të arrestuarit janë duke u marrë në pyetje dhe prokuroria do të kërkojë nga gjykata të urdhërojë mbajtjen e tyre në paraburgim.
