Sali Berisha ka qenë paraditen e kësaj të premteje në Krujë, ku gjatë bashkëbisedimit me qytetarët hodhi akuza drejt Edi Ramës në lidhje me vilën e ndërtuar në Surrel.
Sipas Berishës, veç burimit të dyshimtë të të ardhurave, toka është marrë në kundërshtim me çdo ligj. Sipas liderit demokrat, SPAK për të shpëtuar nga hetimi ia kaloi dosjen Prokurorisë së Tiranës, por një gjyqtar ia ka rikthyer sërish për hetim Prokurorisë së Posaçme.
Berisha tha se për këtë dosje, para dy ditësh është bërë mbledhje urgjente në SPAK.
“Ka 2 muaj që është mbyllur nuk del para asnjë gazetari sepse nuk di të përgjigjet, nuk mund të mashtrojë më. Nuk mund të përgjigjet për të gjitha vjedhjet e mëdha. Se ka marrë 130 milionë euro të djegësit të Tiranës dhe djegësi nuk ekziston dhe i ka ngelur tani rroftë e qoftë Altin Dumani që nuk më dënon.
Sarajet e tij në Surrel janë me themele dy herë më të gjata se sarajet e Enver Hoxhës në qendër të Tiranës. Me një dallim, diktatori nuk i regjistroi në emrin e vet, as të familjes së tij, por i regjistroi pronë shtetërore. Dhe në atë kohë shtëpia lejohej të regjistrohej. Ky jo që e ka në emër të vet dhe që e ka ndërtuar duke pasur të deklaruar gjithsej 3800 euro, por ka një oborr 8300 metra. Dhe jo vetëm kaq, po tokën e ka marrë në kundërshtim me çdo ligj dhe këto janë kapur tani. Skapi ia kaloi për të shpëtuar, prokurorisë së Tiranës. Prokuroria e Tiranës tha me të drejtë, nuk është puna jonë kjo. E ktheu prapë. Shkoi në gjykatë çështja, një gjykatës guximtar e urdhëroi Skapin ta hetojë.
Ka qenë dy ditë më parë në Skap janë bërë mbledhje emergjente. Ra bomba dhe ky dilte pasdite burrë më të mirë se Altin Dumani nuk ka Shqipëria, sepse duket se përsëri bënë një marëveshje për ta mbyllur dosjen përsëri. O Edvin, po le ta mbyllë 100 herë, por toka është aty.
Pra, në këtë aspekt, është i pashpresë. Asgjë nuk e shpëton. Aktet që ka kryer ai me Lubi Ballukun janë të pafalshme dhe ato në fakt përbëjnë një dënim përjetë për secilin që kryen akte të tilla.” – u shpreh Berisha.
