Nga Boldnews.al
Në qendër të Elbasanit, vetëm pak metra nga Godina e Policisë, është në përfundim një ndërtesë dy-katëshe, dukshëm e destinuar për biznes.
Një informacion i mbërritur në redaksinë e “Boldnews.al” thotë se godina është në pronësi të Leli Kajës, administratorit të shoqërisë publike të landfillit të Elbasanit, “Eco-Elb”. Sipas denoncimit, kjo godinë po ndërtohet pa lejen e organeve përkatëse dhe askush nuk guxon ta prekë, pasi pronari i saj ka lidhje të fuqishme në Policinë dhe institucionet vendore lokale.
Denoncuesi, i cili duket se është punonjës ose ka informacione nga brenda Bashkisë së Elbasanit, thotë se për punimet në këtë godinë, pronari është pajisur me formularin 6, pra për veprimtari që nuk kërkohen leje ndërtimi. Ndërsa, situata në terren tregon se punimet mbi atë godinë duken mirëfillti ndërtim, të cilat kërkojnë leje të posaçme.
Mbi bazën e këtij informacioni, “Boldnews.al” kreu një vëzhgim në Elbasan. Godina gjendet në rrugën “28 Nëntori”, përballë me zyrat qendrore të Policisë së Elbasanit.
Ndërtesa, siç duket nga pamjet e fotografuara nga redaksia, është gati për t’u vënë në funksion. Rreth godinës nuk ka asnjë tabelë që tregon për punimet që po kryhen apo se kush subjekt po i realizon ato.
Ligji për “Ndërtimin” detyron të gjithë subjektet, publike apo private, që të shfaqin tabelën e punimeve, në rastet kur pajisen me leje ndërtimi.
I njëjti ligj përjashton nga detyrimi për leje ndërtimi apo për deklarim paraprak, rastet kur kryhen ndërhyrje minimaliste, si rregullim çatie, dritaresh, lyerje fasade e të tjera të ngjashme.
Nga ajo që vëzhgoi “Boldnews.al”, mbi godinën, për të cilën denoncuesi deklaron se është në pronësi të zyrtarit të rëndësishëm lokal, Leli Kaja, konstatohen punime të natyrave të ndryshme, me volume të mëdha, të cilat, si rregull, duhet të pajiseshin me leje ndërtimi dhe kjo e fundit të shfaqej dukshëm në kantier.
Nëse është i vërtetë informacioni, atëherë rasti është një dëshmi e fortë për mungesën totale të funksionimit të strukturave kontrolluese, përfshirë Policinë e Shtetit që e ka çdo ditë para syve, ashtu edhe të Inspektoratit të Mbrojtjes së Territorit të Bashkisë së Elbasanit, strukturë që dikur është drejtuar nga vetë Kaja.
Simbioza Gledian Llatja-Leli Kaja
Leli Kaja konsiderohet si një prej bashkëpunëtorëve më të ngushtë të kryebashkiakut të Elbasanit, Gledian Llatja. Ai ka mbajtur më parë postin e Kryeinspektorit Ndërtimor dhe drejtorit të Ujësjellësit të qytetit.
Me firmën e kryebashkiakut Llatja, Leli Kaja është emëruar administrator i shoqërisë publike, “Eco-Elb”. Kjo kompani është në pronësi të shtatë bashkive të qarkut të Elbasanit. Por, Bashkia e Elbasanit, nën drejtimin e Llatjas, është aksioneri maxhoritar dhe, rrjedhimisht, edhe përcaktues në emërimin e zyrtarëve drejtues.
Shoqëria “Eco-Elb” ka objekt të aktivitetit të saj menaxhimin e landfillit dhe inceneratorit jo-funksional të Elbasanit.
Prej disa muajsh, Prokuroria e qytetit ka nisur hetime për kompaninë publike dhe zyrtarët drejtues, nën dyshimet për “shpërdorim detyre” dhe “menaxhim të mbetjeve”. Ky hetim ka nisur pas djegies periodike të mbeturinave në landfill, duke sjellë pasoja të rënda mbi jetën dhe shëndetin e qytetarëve.
Pak javë më parë, oficerët e Policisë Gjyqësore sekuestruan dokumentacionin pranë “Eco-Elb”, për të vlerësuar mbi mënyrën se si janë shpenzuar fondet publike, si edhe bashkëpunimin e dyshimtë me kompanitë private që operojnë në shërbimin e menaxhimit të mbetjeve në landfill.
Së fundmi, në objekt të hetimit, është shtuar edhe verifikimi i informacioneve mbi punësime fiktive në landfill. Sipas informacionit të siguruar në rrugë operative, dyshohet se Leli Kaja ka emëruar rreth 100 persona fiktivisht, sidomos në prag të fushatës elektorale. Megjithatë, këto të dhëna janë ende në fazën e dyshimit dhe pritet që Prokuroria e Elbasanit të hedhë më shumë dritë mbi këto të dhëna.
Tender i paracaktuar? Leli Kaja, gjysmë mln euro për menaxhimin e “mbretërisë së plehrave”
Abuzimi/ Leli Kaja, administratori i inceneratorit që nuk punon. Sa po vidhet në Elbasan?
Prokuroria e Elbasanit nis hetim të dytë për inceneratorin dhe “Eco-Elb” të Leli Kajës
Hetimi/ “Eco-Elb” i dha 400 mijë euro, “Ergi” dyshohet për keqmenaxhimin e landfillit Elbasan
