Një 34-vjeçar është vënë në pranga nga policia në Korçë pasi u kap në flagrancë teksa shiste doza kokainë në qytet. Policia bën e dije se i arrestuari gjithashtu nxiste të miturit të futeshin në këtë veprimtari kriminale për të shpërndarë doza kokaine.
34-vjeçari është identifikuar si Spartak Selimi.
Nga kontrolli në banesë mësohet se janë gjetur dhe sekuestruar një sasi lënde e dyshuar narkotike kokainë, e ndarë në doza gati për shitje.
Gjithashtu janë proceduar dy persona pasi ata u kapën në lagjen nr. 6 me doza kokainë, të cilat sapo ia kishin blerë 34-vjeçarit.
“Specialistët e Seksionit për Hetimin e Narkotikëve të DVP Korçë, si rezultat i veprimeve hetimore të kryera pas informacioneve të siguruara nga inteligjenca informative, goditën një rast të shitjes së lëndëve narkotike, në doza. Në vijim të veprimeve për këtë rast:
-u arrestua në flagrancë shtetasi S. S., 34 vjeç, banues në Korçë, për veprat penale “Prodhimi dhe shitja e narkotikëve” dhe “Shtytja e të miturit në krim”.
Ky shtetas, ndërkohë që ishte me masë sigurie “Arrest në shtëpi”, për veprën penale “Prodhimi dhe shitja e narkotikëve”, shiste doza kokaine në qytet dhe shtynte një shtetas të mitur, që të ushtronte këtë veprimtari kriminale. Gjatë kontrollit në banesën e shtetasit S. S. u gjet një sasi lënde e dyshuar narkotike kokainë, e ndarë në doza gati për shitje;
-nisi procedimi në gjendje të lirë për shtetasin M. D., 26 vjeç, banues në Vorë, dhe për një shtetas 17 vjeç, banues në Korçë, për veprën penale “Prodhimi dhe shitja e narkotikëve”. Këta shtetas u kapën në flagrancë, në lagjen nr. 6, Korçë, me doza të lëndës së dyshuar narkotike kokainë, të cilat sapo ia kishin blerë shtetasit S. S.”- njofton policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme.
