Policia e Durrësit, pas një hetimi dy javor, ka zbuluar një ambient që ishte marrë me qira dhe ishte përshtatur për ushtrimin e prostitucionit.
Si rezultat, janë proceduar penalisht dy shtetase kineze që kishin marrë me qira banesën dhe ushtronin prostitucionin, si dhe 6 shtetas shqiptarë që janë gjetur brenda banesës.
Më konkretisht, në kuadër të operacionit të koduar “Storm 3″ janë vënë nën hetim shtetaset kineze R. W, 54 vjeçe, X. X., 41 vjeçe, si dhe 6 persona nga Durrësi dhe Kruja që janë gjetur në banesën e dy shtetasve kineze.
“Nga veprimet hetimore të kryera gjatë hetimit proaktiv rezultoi se shtetaset kineze në lagjen nr.13, Plazh, Durrës, kishin përshtatur një ambient të marrë me qira, dhe ushtronin prostitucionin. Po nga hetimet ka rezultuar gjithashtu se një grup i strukturuar kriminal në përbërjen e të cilit janë shtetas kinezë, rekrutojnë shtetase kineze në Kinë dhe më pas i dërgojnë në drejtim të Shqipërisë për kryerjen e aktivitetit kriminal të prostitucionit, ku u sigurojnë apartamente me qira për kryerjen e aktivitetit kriminal dhe pasi sigurojnë klientet nëpërmjet faqeve onlinë i dërgojnë klientit vendndodhjen.” – thuhet në njoftimin e autoriteteve.
Policia thotë se në cilësinë e provës materiale ka sekuestruar dy pasaporta të shtetaseve kineze, 86400 All dhe 440 Euro dhe 3 aparate celular, disa karta telefoni dhe disa karta banke.
Materialet procedurale i kanë kaluar Prokurorisë së Durrësit për veprime të mëtejshme.
