Policia e Shkodrës ka gjetur ditën e djeshme në lagjen “3 Heronjtë” një pako me lëndë plasëse, e dyshuar tritol.
Kontrollet në këtë zonë raportohet se janë ushtruar pas arrestimit të shtetasve Mikelian Toma, 32 vjeç dhe David Simoni, 34 vjeç, të cilët u arrestuan më 26 Mars, pasi lëviznin me një motor me targa të vjedhura dhe me numër shasie të ndryshuar.
Pakoja e tritolit dyshohet se është hedhur prej tyre që më 26 Mars, në momentin kur u pikasën nga Policia dhe nuk iu bindën urdhrit për të ndaluar.
“Në vijim të informacionit të dhënë më datë 26.03.2025, për arrestimin e shtetasve M. T. dhe D. S., të cilët nuk iu bindën urdhrit të Policisë, për të ndaluar motomjetin me të cilin lëviznin, me targë të vjedhur dhe me numër shasie të ndryshuar, bëjmë me dije se nga kontrollet e kryera në vijim të veprimeve hetimore për këtë rast, dje, në lagjen “3 Heronjtë”, është gjetur një pako me lëndë të dyshuar plasëse, e cila dyshohet se është hedhur aty, nga këta shtetas, më datë 26.03.2025. Pakoja u sekuestrua në cilësinë e provës materiale”, njoftoi Policia.
Kujtojmë se Mikelian Toma dhe David Simoni u arrestuan mbrëmjen e së mërkurës në Shkodër, ku dyshohet se ishin nisur për të vendosur një sasi tritoli, por u pikasën nga policia. Motori i tyre u pa në mënyrë rastësore në një prej rrugëve të lagjes “Xhabije”, në të cilën po lëviznin dy persona me skafandra. Në pamje të parë, bluve u është dukur e dyshimtë dhe i kanë bërë shenjë të ndalojë, moment kur drejtuesi i saj i ka dhënë gaz për t’u larguar.
Policia i është vënë në pas nëpër rrugica dhe për 20 minuta ndjekje rrugicë më rrugicë, ka mundur të ndalojë dhe arrestojë dy personat, Toma, drejtues i motoçikletës, dhe Simoni pasagjer. Ndalimi i tyre është bërë pranë Varrezave të Dëshmorëve apo Urës së Kirit në Shkodër, moment kur motori është përplasur në tentativë për t’u arratisur. Nga verifikimi i bluve rezultoi se targa e saj ishte e vjedhur dhe me numër shasie të ndryshuar.
Ende nuk dihet se cila ishte “shënjestra” e dy të rinjëve për t’i hedhur pakon me tritol.
