Një ngjarje e rëndë ka ndodhur mbrëmë në Pogradec, ku një 36-vjeçar është plagosur me thikë për motive të dobëta.
Në lidhje me ngjarjen policia ka arrestuar autorin e dyshuar, 54-vjeçarin L. O., ndërsa është proceduar në gjendje të lirë 38-vjeçari A. B., i cili ndihmoi autorin të largohej nga vendngjarja.
Ngjarja ka ndodhur rreth orës 20:20 në lagjen nr. 3 të qytetit. Sipas hetimeve, pas konfliktit, L. O. është larguar nga vendi i ngjarjes me një automjet tip “Benz”, i ndihmuar nga A. B. Pas disa orësh kërkimesh, policia ka arritur të kapë autorin e dyshuar.
L. O. është arrestuar për veprat penale “Plagosje e rëndë me dashje” dhe “Prodhimi dhe mbajtja pa leje e armëve të ftohta”. Ndërsa A. B. është proceduar për “Përkrahja e autorit të krimit”.
Si prova materiale, janë sekuestruar automjeti dhe mjeti prerës. I plagosuri ka marrë ndihmën mjekësore dhe ndodhet jashtë rrezikut për jetën.
