Gazetari Artan Hoxha ka bërë një deklaratë të fortë sot, ku tha në një emision televiziv se kryebashkiaku Erion Veliaj ka dejtuar mbledhje me video-call nga burgu.
Sipas tij Veliaj ka pasur komunikime me njerëzit e tij gjatë qëndrimit në qeli, e kjo madje ka shkaktuar që në paraburgimin e Durrësit të bëhen kontrolle e të mblidhen të gjithë telefonat.
“Ai thotë që ia keqinterpretuan vendimin. Po si ia keqinterpretuan? Ai fliste me drejtorin juridik, pse u shkarkua drejtori juridik, gjithashtu edhe nënkryetarja e bashkisë që donte të emëronte ai. Këta janë vetëm ata që janë publikuar po në bashki është bërë nami, janë shkarkuar dhe të tjerë. Tjetra, Erion Veliaj në mirëbesim e sipër duke menduar se ishte njeriu i pushtetshëm, ka komunikuar dhe nga burgu, ka bërë mbledhje nga burgu. Ai nuk e ka bërë me celularin e policëve, por për shkak të tij tani janë mbledhur gjithë telefonat e burgut. Ai është mbajtur si burgu më liberal deri më tani në Shqipëri. Por kur ti vjen dhe bën atë luftë që bën me prokurorin dhe nga ana tjetër kërkon të bëjë mbledhje me stafin e tij nga burgu”,-tha Hoxha në Euronews Albania.
Më tej Hoxha shtoi se që me daljen e listave të kandidatëve për deputet të Partisë Socialiste, Veliajt i janë rralluar vizitat në burg nga kolegët e bashkëpunëtorët.
“Ka bërë mbledhje me videocall me stafin e tij. Që kur ka dalë lista e Ramës për Tiranën, një pjesë të tyre i kam gjetur te qelitë. Tani nuk i shkon më njeri. Çdo gjë që ka përmendur Veliaj këto kohë i është kthyer kundër, çdo njeri po hetohet.
Çdo fjalë që ka thënë i është kthyer kundër. Kemi çështje të re, Veliaj është më tepër Konti Montekristos se sa se Jozef K.
Po të dalin të dhënat nga përgjimet opozita mund të bëjë spektakël. Veliaj nuk bëhet ‘pendito’. Erion Veliaj s’të trembte fizikisht kur ishte kryetar bashkie, jo të të trembi me pranga. Efektivi ia ka dhënë telefonin në mirëbesim.
Po dha dorëheqjen Veliaj e dëmton Ramën, e detyron ta çojë bashkinë në zgjedhje të parakohshme. Veliajt i janë hequr puplat si zog fshati, tani diskutohet vetëm do ta pjekin në hell a ça do ta bëjnë. Është i mbaruar”, tha Hoxha.
