Një tragjedi ka ndodhur në Maqedoninë e Veriut pas një zjarri të madh që shpërtheu në një diskotekë në Koçan, ku humbën jetën 51 të rinj dhe 118 të tjerë u plagosën.
President Bajram Begaj ka shprehur ngushëllimet për familjet e viktimave dhe të gjithë qytetarët e Maqedonisë.
“I tronditur nga tragjedia e ndodhur, nga humbja e jetëve të reja dhe lëndimi i shumë të tjerëve nga zjarri i rënë në një diskotekë në qytetin Koçan të Maqedonisë së Veriut.
Ngushellimet e mia të sinqerta shkojnë për familjarët që humbën të afërmit e tyre dhe për të gjithë popullin fqinj të Maqedonisë së Veriut.
Lutjet e mia dhe të popullit shqiptar shkojnë për të lënduarit, që të gjejnë shërim të shpejtë e të mos rëndojë më shumë dhimbja në qytetin e Koçanit.“- shprehet Bajram Begaj.
Kryeministri i Shqipërisë, Edi Rama, ka shprehur ngushëllime të thella për popullin e Maqedonisë së Veriut dhe për familjet e viktimave.
Rama ka shprehur gatishmërinë për të ofruar çdo lloj ndihme që mund të jetë e nevojshme, ndërsa i ka dërguar ngushëllime të sinqerta edhe kryeministrit maqedonas, Dimitar Kovaçevski, dhe autoriteteve të Maqedonisë së Veriut.
“Me një ndjenjë hidhërimi të veçantë u përcjell vëllezërve e motrave të Maqedonisë së Veriut ngushëllimet e mia për tragjedinë e madhe të Koçanit. Jam pa fjalë dhe lutem që të lënduarit të shërohen dhe që familjarët e viktimave të gjejnë forcën të përballojnë humbjen e tyre të pangushëllueshme. I përcjell po ashtu kryeministrit Mickovski dhe autoriteteve të vendit fqinj ngushëllimet në emër të Shqipërisë e shqiptarëve, duke shprehur gatishmërinë për çfarëdoqoftë ndihma jonë mund të jetë e nevojshme.”– shkruan Rama.
Kryetarja e Parlamentit, Elisa Spiropali, shprehu pikëllimin e saj të thellë për ngjarjen tragjike dhe ofroi ngushëllimet për familjet që humbën të dashurit e tyre.
Ajo gjithashtu uroi shërim të shpejtë për të lënduarit dhe shprehu forcë dhe kurajë për popullin dhe autoritetet e Maqedonisë së Veriut për të përballuar këtë fatkeqësi të madhe.
“Pikëllues lajmi mbi tragjedinë e tmerrshme në Koçan të Maqedonisë së Veriut, ku humbën jetën disa dhjetëra vajza e djem. Në këtë të dielë të trishtuar, jam pranë familjeve që humbën njerëzit e tyre të dashur.
Të lënduarve u uroj shërim të shpejtë. Forcë e kurajë popullit dhe autoriteteve të Maqedonisë së Veriut në përballimin e kësaj fatkeqësie të madhe.”- shkruan Spiropali.
Kreu i Partisë së Lirisë, Ilir Meta, shprehu ngushëllimet e tij të sinqerta për familjet e viktimave, duke theksuar se humbjet janë të mëdha dhe të pazëvendësueshme.
Ai gjithashtu uroi shërim të shpejtë për të mbijetuarit dhe shprehu solidaritetin e plotë për autoritetet dhe qytetarët e Maqedonisë së Veriut, duke qëndruar pranë popullit të fqinj në këto momente të vështira dhe të dhimbshme.
“Me hidhërim dhe tronditje të thellë përcolla tragjedinë e madhe në Koçan të Maqedonisë së Veriut.
Në këtë ditë të rëndë, unë dhe Partia e Lirisë u shprehim ngushëllimet më të ndjera familjeve të viktimave për humbjet e mëdha dhe të pazëvendësueshme dhe lutemi për shërim sa më të shpejtë të të mbijetuarve!
I përcjell Kryeministrit Hristijan Mickoski, autoriteteve dhe qytetarëve të Maqedonisë së Veriut fqinje dhe mike solidaritetin e plotë dhe qëndrojmë pranë tyre në këto momente të dhembshme!”- shkruan Meta.
