Etnik Brruti do të jetë futbollisti i radhës që ka vendosur të lërë Kosovën, aty ku ka mbajtur shirtin e kapitenit për U21 dhe ka zgjedhur që tani e tutje të përfaqësojë Shqipërinë.
Brruti luan me Malishevën në Superligën e Kosovës dhe konsiderohet si një lojtar shumë premtues për të ardhmen. Telegrafi raporton se mesfushori i ka dërguar FFK-së një letër të gjatë, ku i bën me dije për vendimin e tij për të lënë Kosovën dhe se do largohet në drejtim të Shqipërisë
“Unë kam vendosur të largohem në drejtim të Shqipërisë. Do ta marrë pasaportën shqiptare për të bërë transferim në ndonjë ligë tjetër ku pasaporta shqiptare më ndihmon më shumë. Dua të shoh të ardhmen time në nivel klubesh dhe të ardhmen e familjes time”, thuhet ndër të tjera në letrën që Brruti i ka dërguar FFK-së, raporton Telegrafi.
Po ashtu FSHF i ka dërguar një letër zyrtare FFK-së, ku i kërkon që t’i jepet dokumentacioni i Brrutit në mënyrë që ta dërgojnë në FIFA për ndryshim të ekipit kombëtar. Shumë media dhe analistë në Kosovë e kanë cilësuar si “tradhtar” Brrutin për këtë vendim, ndërkohë që ka dhe shumë të tjerë që i urojnë suksese.
