Një 29-vjeçar shqiptar i shpallur në kërkim prej vitit 2022 dhe i dënuar në mungesë me 2,3 vite burg për trafik emigrantësh të paligjshëm, është arrestuar më 5 mars nga policia italiane, në aeroportin Catullo në Verona.
I riu, i cili po mbërrinte me një fluturim nga Tirana, u ndalua gjatë kontrollit të pasaportave nga oficerët e Policisë së Shtetit në doganë, të cilët kontrolluan dokumentin e tij dhe zbuluan se emri ishte subjekt i një urdhri burgu të lëshuar nga Prokuroria Publike e Veronës. Shqiptari ishte dënuar në vitin 2018 për krime të lidhura me emigracionin.
29-vjeçari kishte pasur edhe më parë probleme me ligjin në Itali. Në vitin 2015 , në fakt ai ishte dëbuar nga territori kombëtar nga Gjykata e Vareses , me një dispozitë që i ndalonte hyrjen për pesë vjet. Kjo masë u mor pasi i dyshuari ishte arrestuar për posedim dhe tregtim droge në vitin 2014.
Pavarësisht dëbimit, në vitin 2018 shqiptari kishte tentuar të rihynte në Itali, duke kaluar nga aeroporti i Veronës, pa autorizimin e nevojshëm, duke shkelur ndalimin.
Pas arrestimit, 29-vjeçari do të duhet të vuajë një dënim prej dy vjet e tre muaj burg, si dhe një gjobë prej dy mijë eurosh. Pas procedurave formale, ai u transferua në burgun Montorio , ku do të qëndrojë në dispozicion të Autoritetit Gjyqësor, për ekzekutimin e dënimit.
