Vrasja me thikë e 14-vjeçarit Martin Cani nga një bashkëmoshatar i tij, njëherazi edhe nxënës në shkollën “Fan Noli”, shërbeu si arsye për qeverinë për t’i dhënë rrugë një nisme që në finale çoi në mbylljen e rrjetit social TikTok.
Sherri mes adoleshentëve nisi në ambientet e shkollës më 18 nëntor të vitit të kaluar dhe në shkurt të këtij viti, Prokuroria e Tiranës mbylli hetimet dhe dërgoi për gjykim autorin 14-vjeçar me akuzën vrasje në rrethana cilësuese kundër dy ose më shumë personave. Seanca paraprake ndaj të akuzuarit do të mbahet në Gjykatën e Tiranës, më 10 mars.
Në një bisedë telefonike që A2 CNN bëri me babin e Martin Canit, mohoi që sherri mes fëmijëve të kishte nisur në TikTok për faktin e thjeshte se Martini nuk e ka përdorur kurrë TikTok-un.
Lidhur me këtë nismë të qeverisë, qytetarët janë të ndarë në mendime, disa pro e disa të tjerë kundër mbylljes së kësaj platforme.
Por ndërkohë, menjëherë pas vrasjes së Martin Canit, institucionet shqiptare u zotuan se do të kishte kontrolle të imtësishme dhe takime të herë pas hershme mes Policisë së Shtetit dhe Ministrisë së Arsimit që ngjarje të tilla të parandaloheshin. Këto kontrolle u intensifikuan gjatë ditëve të para që në disa shkolla të vendit u zbuluan nxënës me sende të jashtëligjshme në çantat e shkollës.
Por duket se këto kontrolle mbetën po aty, pasi në ditët e sotme, ka ende fëmijë që në shkolla mbajnë thika apo sende të forta. Rasti më i fundit faktoi se të enjten një 19 vjeçar u arrestua në Tiranë pasi kanosi drejtoreshën e shkollës së mesme “Sevati Qirjazi” në Tiranë, pasi i mori celularin. Teksa e denoncoi në polici, 19-vjeçari, djalë i një punonjësi polici kundërshtoi edhe efektivët, ndërsa me vete në çantë iu gjet edhe një thikë./A2 CNN
