Edi Rama ka reaguar në lidhje me vendimin e Qeverisë për mbylljen për 1 vit të rrjetit social TikTok, teksa Sali Berisha e konsideroi si një akt censure dhe lajmëroi një protestë kombëtare më 15 Mars.
Rama vazhdon të justifikohet se këtë vendim e ka marrë si masë kundër nxitjes së dhunës mes të rinjve, pas vrasjes tragjike të nxënësit 14-vjeçar Martin Cani pranë shkollës “Fan Noli” në Tiranë, edhe pse vetë “TikTok” e konfirmoi se si autori, po ashtu edhe viktima nuk kishin llogari në këtë platformë.
Rama thotë se vendimi është marrë pas një konsultimi të gjerë me 65 mijë prindër e mësues, edhe pse shpesh në prononcimet për mediat, prindërit pretendojnë se nuk i ka pyetur askush.
“Vendimi për mbylljen e përkohshme të TikTokut është e para një vendim i marrë në konsultimin e gjerë me 65 mijë prindër e mësues dhe e dyta, është një vendim i marrë pasi u ngritën kapacitetet e nevojshme teknike, ndërkohë që ne jemi në një dialog shumë pozitiv me kompaninë, e cila së shpejti do të vijë në Shqipëri për të na paraqitur qoftë një sërë masash për rritjen e sigurisë për fëmijët, përfshirë edhe në gjuhën shqipe, qoftë disa risi në shërbim të mësimeve e të studimeve
Ne themi atë që bëjmë dhe bëjmë atë që themi” – shkruan Rama në “X”.
