Policia e Tiranës, ka ekzekutuar operacioni policor të koduar “Fshehtësia”, duke goditur dy raste të shitjes së drogave të forta dhe duke arrestuar dy persona.
Më konkretisht, në pranga është vënë shtetasi Faik Kurti, banues në Tiranë, i cili është ndaluar nga efektivët e komisariatit nr. 2 teksa po udhëtonte me taksi në rrugën e Kavajës.
Blutë e kryeqytetit bëjnë me dije se nga kontrollet fizik dhe në banesë, Kurtit i janë gjetur doza heroine (me peshë totale 50 gramë), 250 000 lekë, 100 euro dhe 1 peshore elektronike. Ai akuzohet për veprën penale “Prodhimi dhe shitja e narkotikëve”.
Gjithashtu, në pranga është vënë dhe shtetasi Eneo Ndoj, 36 vjeç, banues në Fier, i cili është kapur nga Policia e Vorës në fshatin Muçaj, teksa po udhëtonte me automjetin e tij.
Raportohet se nga kontrolli në automjet, uniformat blu kanë gjetur një pako me 56 gramë kokainë. Po ashtu, edhe ai akuzohet për veprën penale “Prodhimi dhe shitja e narkotikëve”.
Materialet procedurale iu referuan Prokurorisë së Tiranës, për veprime të mëtejshme.
