Shqipëria është vendi i parë në rajon, i nënti në Europë dhe i njëzeti në botë për çmimin më të lartë të naftës. Të dhënat nga platforma “Global Petrol Prices” një litër naftë në vend kushton gati 1.8 dollarë.
Hong Kongu është shteti ku nafta kushton më shumë, mbi 3 dollarë për litër, ndërsa Venezuela më e lia me 4 cent për litër.
“Shumë shtrenjtë në raport me rrogat që marrim. Në Maqedoni dhe Kosovë nafta kushton gati 1 euro. 1 mijë e 80 lekë”, thonë drejtuesit e automjeteve.
Në fillim të vitit një litër naftë në vend shitej mesatarisht për 185 lekë, për të rënë në 183 lekë për litër në shkurt. Aktualisht në pikat e karburanteve, lënda djegëse tregtohet për rreth 173 lekë për litër.
“I bëjmë rritje kryeministrit të hapi rafineritë që të ulet çmimi. Janë çmimet më të larat në vitet e fundit”.
Çdo litër naftë që shitet në pikat e karburanteve është i përbërë nga çmimi me të cilin lënda djegëse blihet në bursa dhe taksat e tarifat që aplikohen nga qeveria. Të dhënat nga bursa Platts tregojnë se çmimi naftës ka rënë në690 dollarë për ton nga 831 një vit më parë.
Duke qenë se lënda blihet në dollarë, ndryshimi i kursit të këmbimit është faktor i rëndësishëm për përcaktimin e çmimit. Sipas kursit të Bankës së Shqipërisë, edhe valuta amerikane vijon të mbetet e zhvlerësuar në raport me lekun. Po pse nuk ulet çmimi i naftës në vend?
“Duke qene se kërkesa për produktet vijon të rritet, kjo rrjedhimisht sjell çmime të larta nga pikat e karburanteve.”, shprehet Mikela Qafa, ekspert për ekonominë ekonominë.
Bashkë me Serbinë, Shqipëria është vendi me çmimin më të lartë të naftës në Ballkanin Perëndimor. Më pas renditen Mali i Zi, Bosnje-Hercegovina dhe Kosova. Maqedonia e Veriut ofron çmimin më të ulët të naftës aktualisht, rreth 1.25 dollarë për litër./A2 CNN
