Aleksandër Çipa ishte këtë të martë në “Now me Erla Mëhillin” në Euronews Albania ku ka komentuar krijimin e koalicionit opozitar “Aleanca për Shqipërinë Madhështore” ku kryetar i koalicionit do të jetë kreu i Partisë Demokratike, Sali Berisha.
Çipa tha se “madhështores” nuk mund ti besojë duke pasur parasysh kontekstin gjeopolitik, ndërsa shtoi se ka një problem në këtë koalicion pasi është hequr kriteri doktrinar dhe ai i përkatësive programore mes partive.
“E para kësaj “madhështore” nuk i besoj se në kontekstin gjeopolitik vetëm të pavarur nuk mund të shpallemi. E dyta, sa i përket koalicionit, rasti i bashkëjetesës në një koalicion mes PBDNJ dhe PDIU-së është në një kontekst të ri, pasi janë dy realitete të ndryshme.
Gjithashtu është një problem pasi është hequr ai që quhet kriteri doktrinar dhe ai i përkatësive programore mes partive. Ka një qasje që opozitarët duhet ta sqarojnë mirë, se ky solidariteti koalicional kaq i madh zoti Rama i përgjigjet me një lloj karshillëku që nuk e ka më ëndërr anëtarësimin në BE, por e mbyll këtë në 2030”,-tha Çipa.
Koalicioni, i emërtuar Aleanca për Shqipërinë Madhështore (ASHM), përbëhet nga 26 parti politike, duke përfshirë aleatët kryesorë të PD-së si; PL e Ilir Metës, PR e Fatmir Mediut dhe PDK e Nard Ndokës.
