Partia Demokratike ka depozituar në limitet e afatit në Komisionin Qëndror të Zgjedhjeve shkresën për regjistrimin e koalicionit, ku në zgjedhjet parlamentare të 11 Majit do të garojë me një listë të përbashkët me 25 parti të tjera.
Emri i koalicionit do të jetë “Partia Demokratike – Aleanca për Shqipërinë Madhështore”, me shkronjat nistore “PD-ASHM” dhe kryetari i saj do të jetë Sali Berisha.
Bëhet fjalë për një koalicion me bazë të gjërë, ku risia kryesore duket se është Partia për Drejtësi Integrim dhe Unitet (PDIU) e drejtuar nga Shpëtim Idrizi. Burime për mediat bëjnë me dije se palët janë dakordësuar për një kandidat në listë të sigurt, teksa do të ketë edhe kandidatë në listë të hapur.
Negociatat kanë vijuar deri në orët e vona, pasi PDIU kërkonte dy kandidatë në listë të sigurt, teksa në fund, siç duket ka pranuar edhe me një të tillë.
Vlen të theksohet fakti se deri më tani, Shpëtim Idrizi ka qenë i distancuar nga PD e Berishës, për faktin se pretendonte se nuk mund të ishte në një koalicion me partinë e minoritetit grek PBDNJ-në e drejtuar nga Vangjel Dule, por siç duket, e ka hequr këtë vijë të kuqe. Edhe në vitin 2021, deputetët e PDIU-së u futën në Kuvend nga listat e PD-së, por gjatë kësaj legjislature, në jo pak raste i kanë bashkuar votat me mazhorancën e Edi Ramës.
Pjesë e koalicionit është edhe Partia e Lirisë e drejtuar nga Ilir Meta, ku ky i fundit, edhe pse në qeli, do të jetë në listën e sigurt të PD-së në Tiranë. Po ashtu, në listë të sigurt do të vendosen dhe 3 emra të tjerë nga PL, Tedi Blushi, Edmond Haxhinasto dhe Erisa Xhixho.
Në koalicion janë edhe Partia Republikane e Fatmir Mediut, PBDNJ e Vangjel Dules dhe Partia Agrare e Agron Dukës. Ata janë dakordësuar me Berishën për të marrë nga një vend të sigurt në listë, ku do të jetë Mediu dhe Dule, ndërsa Duka do të vendosë një emër tjetër nga partia e tij.
Pjesë e koalicionit është edhe Partia Demokristiane e Nard Ndokës, por ende nuk dihet nëse ai do të kandidojë në listë të sigurt apo të hapur.
Ndërkohë, në koalicion janë futur edhe kryetarët e partivë që u futën në Kuvend, pas djegies së mandateve nga ana e opozitës, që shpesh PD-ja i konsideronte si “Kërpërata”, ku më konkretisht bëhet fjalë për Selami Jenisheri, Kostaq Papa, Kujtim Gjuzi, Zef Shtjefni, Adriatik Alimadhi, Adriatik Roshi, etj.
Në koalicion janë futur edhe Rivelino Çuno, kryetar i partisë së komunitetit egjiptian dhe rom, si dhe Vasil Sterjovski, kryetar i komunitetit maqedonas në Shqipëri. Po ashtu edhe ata të dy e morën mandatin dhe u futën në Kuvend, kur PD i dogji ato. Pjesë e koalicionit janë dhe partia e Sazan Gurit, Arian Starovës, FRD e Sali Shehut, etj.
Deri tani në media është raportuar se aleatët do të kenë 8 mandate në listë të sigurt, si dhe disa në listë të hapur, por kjo mbetet për t’u parë kur të dorëzohen listat e kandidatëve për deputet.
“Numri përkatës i kandidatëve që do të propozojë çdo parti pjesë e koalicionit, do të specifikohet në momentin e depozitimit të listës shumëemërore të kandidatëve, sipas formatit të fletës së votimit të përcakuar nga KQZ në këto zgjedhje. Në listën shumëemërore të koalicionit do të përfshihen, për çdo parti të Koalicionit, numri i kandidatëve dhe renditja e tyre, bazuar në peshën elektorale dhe negociatat e zhvilluara nga secila parti”, thuhet në marrëveshjen e depozituar në KQZ.
