Empoli shkroi historinë duke u kualifikuar në gjysmëfinalet e Kupës së Italisë, pasi eliminoi me penallti ekipin që ka më shumë trofe të tillë, Juventusin. Për toskanët në fushë 45 minutat e para luajti edhe Ardian Ismajli, që u zëvendësua menjëherë me nisjen e fraksionit të dytë.
Ky veprim nxiti mediet në Itali të shkruanin se Ismajli vuan një lëndim, por diçka e tillë nuk është e vërtetë. Këtë e konfirmon trajneri Roberto D’Aversa i cili thotë fjalët më të mira për kapitenin e ekipit.
“Nuk është një rastësi që u kthye Ismajli. Është shumë e rëndësishme që e kemi sërish të gatshëm, pasi është ai që na udhëheq dhe na lejon të tregohemi më kërkues në fushë”, tha ai.
Tanimë edhe Sylvinho mund të ndihet i lehtësuar pasi Ismajli dhe Gjimshiti duken të gatshëm dhe në formë pas lëndimeve. Kombëtarja jonë luan në Londër kundër Anglisë më 21 mars dhe tre ditë më vonë pret Andorrën në Tiranë, sfidat këto hapëse të kualifikueseve për Botërorin 2026.
