Sebastian Muçmata ka dalë ditën e sotme në gjyq për plagosjen me armë zjarri të kushëririt të kryebashkiakut të Kukësit, Elvis Halilaj.
Në seancën e sotme bëhet me dije se Gjykata e Kukësit e ka lënë vëllanë e drejtorit bashkiak në Kukës Zenel Muçmata, në masën e sigurisë arrest me burg pa afat.
Ngjarja ndodhi disa ditë më parë në fshatin Bicaj të Kukësit. Sebastian Muçmata, vëllai i Zenel Muçmata, i cili mban postin e drejtorit të shërbimeve në Bashkinë e Kukësit ka plagosur me armë zjarri Elvis Halilaj, i cili është dhe kushëri i kryetarit të Bashkisë Kukës, Albert Halilaj.
Plumbi e ka kapur të riun (Elvis Halilajn) në fundshpinë dhe fatmirësisht nuk i ka dëmtuar asnjë organ të brendshëm, ai është transportuar në spital dhe ndodhet në kujdesin e mjekëve.
Ndërkohë autori 25-vjeçar disa orë pas ngjarjes u vetëdorëzua në polici ku ka dorëzuar edhe armën e krimit dhe ka dhënë versionin e tij mbi ngjarjen.
