Kryebashkiaku i Shkodrës Benet Beci është kapur “mat” duke zhvilluar një takim “kokë më kokë” me prokurorin e SPAK-ut, Arben Krajën.
Në rrjet është duke qarkulluar një foto ku Benet Beci shfaqet duke drekuar në një restorant së bashku me Arben Krajën, prokurorin e SPAK-ut, i cili momentalisht është në konflikt interesi për shkak se kryebashkiaku i Shkodrës është nën hetim nga Prokuroria e Posaçme.
Jo pak herë Benet Beci ka hyrë në “godinën e qelqtë” për të dhënë “llogari” përballë prokurorëve pasi raportohet se ndodhet nën hetim për dy vepra penale “korrupsion” dhe “shpërdorim detyre”.
Gjatë “vizitave” të tij në Prokurorinë e Posaçme, Benet Beci “kyçte gojën” dhe nuk jepte asnjë shpjegim interesit të gazetarëve, ndërsa më vonë u përfol dorëheqja e tij, por ishte vetë ai që mohoi gjithçka.
Gjithashtu vlen të përmendim që Benet Beci dhe Arben Kraja kanë njohje të hershme me njëri-tjetrin, por nuk dihet nëse takimi ka qenë në kuadrin e miqësisë apo po diskutohet mundësia si të “shpëtojë” nga akuzat që i janë ngritur kryebashkiakut të Shkodrës.
Nga ky takim janë ngritur disa pikëpyetje ndër të cilat, “çfarë mund ta lidhë kryetarin e bashkisë së Shkodrës dhe prokurorin e SPAK?!”. Njëri nga të dy duhet të shpjegohet përse ka ndodhur ky takim mes të dyve.
Kujtojmë që Entela Lleshi Kruja, vajza e motrës së prokurorit Arben Kraja, është prej vitesh një njeri i besuar i Erion Veliajt (tashmë i arrestuar) i cili gjatë punës si kryebashkiak u kujdes t’i jepte një post “kyç”, atë të shefes se prokurimeve në Bashkinë e Tiranës.
- Si ra Benet Beci në “rrjetën” e SPAK-ut?
Hetimet e Prokurorisë së Posaçme për ish kreun e Autoritetit Rrugor Shqiptar, Evis Berberi, zunë në grackë edhe kryetarin e Bashkisë së Shkodrës, Benet Beci për implikim në afera gjatë kohës që mbante postin e drejtorit të Përgjithshëm të KESH. Gjatë hetimeve për Berberin, prokurorët e SPAK mes të tjerash kanë sekuestruar edhe telefonin e bashkëshortes së tij A. Ruko.
Por ndonëse ishin nisur për të gjetur prova të mëtejshme në ngarkim të Berberit, në telefonin e zonjës Ruko, prokurorët kanë gjetur dhe disa komunikime mes ish kreut të rrugëve dhe ish drejtorit të KESH. Njëri prej tyre, më flagranti lidhet me një tender me vlerë 832 mijë euro të zhvilluar nga KESH për kontraktimin e një studimi për strategjinë e sektorit energjetik. Bashkëshortja e zotit Berberi ishte caktuar kryetare e Komisionit të Vlerësimit të Ofertave të tenderit.
Studimi, i cili do të kryhej në bashkëpunim me profesorë të Harvardit duket se kishte para për të ndarë edhe për dy ish zyrtarët, të cilët donin jo pak por mbi 40 për qind të fondit. Në një nga SMS-të e gjetura nga prokurorët e SPAK, duke ju referuar tenderit për studimin, Evis Berberi i shkruan Benet Becit: “500 mijë euro për profesorët e Harvardit, 320 mijë euro për ne me dy klasë shkollë.”
Por SMS-ja kompromentuese e Berberit për Becin nuk është prova e vetme. Më vonë ka rezultuar se prokurimi është kryer pikërisht ashtu./ Boldnews.al
