Megjithëse data shënon 13 shkurt, në institucionin e vuajtjes së dënimit me burg për gratë në qytetin e Pogradecit, u zhvillua një aktivitet argëtues në kuadër të Shën Valentinit, i mundësuar nga një ish-e dënuar, e cila ofroi një dixhej dhe një koktejl për gratë dhe vajzat në konflikt me ligjin.
Festa e 14-shkurtit simbolizon dashurinë mes një mashkulli dhe një femre, e cila përfaqëson një ditë të veçantë për çiftet, por që nuk ka penguar gratë dhe vajzat në burgun e Pojskës të Pogradecit të festojnë.
Edhe pse pa partnerë, ato kanë shijuar atmosferën festive, duke marrë dhurata dhe duke kërcyer valle, duke krijuar një moment gëzimi e reflektimi brenda mureve të burgut.
Ato u argëtuan nën tingujt e muzikës. Po ashtu, në këtë ditë të rëndësishme, organizata CFN dhuroi pako për të pranishmet.
Këtë Shën Valentin e feston për herë të parë brenda hekurave të burgut, Martina Pajollari, e cila vetëm dy ditë më parë u dënua me 20 vite burg si e dyshuar për bashkëpunim në vrasjen e të dashurit të saj, Martin Çeço.
Në mesazhin e institucionit të Burgut të Grave shkruhet:
“Dashuria është e vetmja forcë e aftë për të shndërruar qiellin me re në dritë plot shpresë”.
Kjo ngjarje simbolizon jo vetëm një moment feste, por edhe forcën e dashurisë dhe shpresës, edhe në kushte të vështira dhe ditë të tjera plotë argëtim dhe shplodhje do të vijojnë të jenë të pranishme në Institucionin e IEVP Pojskë”./Euronews Albania
