Seanca e sotme plenare nuk zgjati aq sa ishte planifikuar. Shkak për këtë u bë një sherr mes Flamur Nokës dhe Taulant Ballës, ku ishin gardistët ata që shmangën një përplasje fizike mes tyre, edhe pse nuk munguan hedhja e shisheve të ujit.
Përjashtimi i Flamur Nokës nga Elisa Spiropali solli bllokim të foltores nga ana e demokratëve, ku nuk munguan përplasjet, pasi deputeti Petrit Doda shkuli mikrofonin dhe e hodhi në drejtim të Taulant Ballës. Kjo solli që seanca të ndërpritej dhe do të vazhdohet ditën e hënë.
Por, teksa brenda sallës situata dukej tejet e tensionuar, ndryshe dukej ajo në oborr të Kuvendit, pas përfundimit të seancës, ku shihet se të dyja palët dalin të buzëqeshur nga parlamenti.
Po ashtu, aparati fotografik ka kapur dhe një episod interesant, ku kreu i grupit parlamentar të PS-së, Niko Peleshi i shkon tek makina Sali Berishës, ku zhvillojnë një bisedë, teksa lideri demokrat shoqërohej nga Flamur Noka.
Pas largimit të Niko Peleshit, pranë makinës së Berishës ishte edhe Damian Gjiknuri, ku siç duket në foto, ata shkëmbejnë batuta, teksa i pranishëm është edhe Ulsi Manja.
