Analisti Enton Abilekaj ka komentuar arrestimin e kryebashkiakut të Tiranës, Erion Veliaj, ku e cilësoi këtë ngjarje si pjesë të një sistemi të thellë korrupsioni dhe abuzimi me pushtetin.
Abilekaj shprehet se, fondet publike janë kthyer në një mjet për të ushqyer një strukturë kriminale që përfshin politikën, biznesin dhe krimin. Ai theksoi se kjo skemë ka krijuar një realitet ku pastrimi i parave është bërë normë dhe Tirana është shndërruar në një simbol të kësaj dukurie.
Abilekaj vuri në dukje se korrupsioni ka kapur të gjitha nivelet, përfshirë median dhe institucionet e tjera, duke bërë që abuzimet të kalojnë pa ndëshkim. Sipas tij, kjo situatë ka sjellë një arrogancë të hapur të pushtetarëve, e cila reflektohet edhe në mënyrën se si ata shfaqin luksin dhe pasurinë e tyre.
“E para vjen ushqyerja e një sistemi kriminal i cili është politikë, biznes dhe krim. Ushqyerja e tij me fondet e buxhetit të shtetit është bërë tashmë normë. Ne e dimë shumë mirë që, për t’u mbajtur kjo normë, duhet që më parë të ketë fonde nga buxheti i shtetit, të cilat janë baza dhe që bashkohen pastaj me fondet e pista që vijnë edhe nga jashtë dhe që ne e dimë se ku shkojnë.
Jo rastësisht Abule ka dalë aty, jo rastësisht Tirana është bërë një dëshmi, muze betoni i pastrimit të parave.
Pastaj ju thoni pse vjen kjo masë abuzimi në atë nivel të blerjes së rrobave dhe bizhuterive.
Pasi përfshihen edhe mediat, blihen edhe mediat dhe bëhen pjesë e kësaj skeme, pasi bien të gjitha pushtetet dhe nuk ka më asnjë kontroll, atëherë fillon një ekshibicion që ne e kemi parë në parlament.
Ne shohim zonjat deputete të bëjnë një paradë në parlament. Tani, pasi ranë pak në sy, filluan të bëjnë më shumë kujdes, por akoma vazhdon. Një paradë mode: kush ka çantën më të bukur, kush ka kostumin më të bukur, orën më të shtrenjtë, etj., etj.
Në këtë paradë mode sigurisht do të përfshihej edhe bashkëshortja e kryetarit të bashkisë. Do të përfshihen të gjithë familjarët e të gjithë atyre që janë pjesë e këtij korrupsioni që është përhapur shumë brenda mazhorancës.
Këto shifra pastaj janë tronditëse: 860 milionë për veshje e bizhuteri apo 32 mijë euro një shishe verë. Janë shifra që tregojnë sesa të papërgjegjshëm dhe të pashpirt janë këta pushtetarë që shpërdorojnë nivele fondesh të tilla në vendin më të varfër të Europës“, tha Abilekaj.
