Avokati dhe sekretari i Përgjithshëm i lëvizjes “Shqipëria Bëhet”, Elton Laska ka reaguar në lidhje me sistemin shëndetësor, ku sipas tij është futur në kolaps me mjekët që vazhdojnë të ikin, teksa Qeveria numëron milionat e korrupsionit me koncesionet abuzive.
Në një postim në rrjetet sociale, Laskaj shkruan se shëndetësia shqiptare po rrënohet, ndërsa qeveria vazhdon të hedhë miliona në tendera korruptivë, duke braktisur pacientët dhe profesionistët e shëndetësisë. Sipas tij, sa më shumë para për PPP, aq më shumë eksod bluzash të bardha.
Laskaj shkruan se pacientët po vdesin për mungesë trajtimi dhe po detyrohen të shesin shtëpitë për t’u kuruar jashtë vendit. Ndërkohë, sipas tij, qeveria mburret se do të ndërtojë 1,400 vende parkimi me pagesë dhe një kopsht luksoz në QSUT, si të ishin këto problemet më urgjente të sistemit shëndetësor.
Reagimi i plotë:
Shëndetësia në Kolaps, mjekët po ikin, qeveria numëron milionat e korrupsionit.
Sa më shumë para për PPP, aq më shumë eksod bluzash të bardha! Shëndetësia shqiptare po rrënohet, ndërsa qeveria vazhdon të hedhë miliona në tendera korruptivë, duke braktisur pacientët dhe profesionistët e shëndetësisë.
465 infermierë vetëm në vitin 2022 kanë braktisur vendin drejt Gjermanisë. Mjekët dhe infermierët largohen, ndërsa qeveria mburret me fasadat e spitaleve që, në të vërtetë, janë bosh, pa mjekë dhe me pajisje që nuk funksionojnë. Nga Tropoja në Sarandë, pacientët sorollaten për një trajtim, sepse e gjithë barra bie mbi QSUT, ku operohet sipas “manualit të bandës së Onkologjikut”.
Në një kohë kur shqiptarët po vuajnë mungesën e mjekëve, kjo qeveri nuk i kursen milionat për aferat e saj korruptive. Vetëm koncesioni i sterilizimit do të përpijë 19 milionë euro në 2025, ndërsa në spitale mungojnë ilaçet dhe pajisjet bazë.
Pacientët po vdesin për mungesë trajtimi, po detyrohen të shesin shtëpitë për t’u kuruar jashtë vendit. Ndërkohë, qeveria mburret se do të ndërtojë 1,400 vende parkimi me pagesë dhe një kopsht luksoz në QSUT, si të ishin këto problemet më urgjente të sistemit shëndetësor.
Shëndetësia nuk mund të mbetet në mëshirë të korrupsionit dhe papërgjegjshmërisë! Ka ardhur koha që ky sektor jetik të kthehet në një prioritet kombëtar dhe të mos përdoret më për pasurimin e një grushti oligarkësh!
