Ish-ministri Genc Pollo, ka komentuar urdhrin e Trump për pezullimin e financimeve të reja të SHBA për pothuajse të gjitha programet e ndihmës ndërkombëtare amerikane si pjesë e përpjekjes së presidentit amerikan për t’i përshtatur këto programe me qëllimet e tij të politikës së jashtme.
Pollo tha në News24 se ka mundësi që programet zhvillimore të SHBA në Shqipëri ndërpriten dhe se sipas tij kjo nuk është diçka e keqe dhe nuk e dëmton vendin tonë.
“Gjuha shkon atje ku dhemb dhëmbi, flasim për reformën gjyqësore për SPAK, gjykatën e posaçme. Në momentin që një shtet arrin në nivel më të lartë nga se ishte kur erdhën programet e SHBA, atëherë ndihma zhvillimore dalëngadalë kalon në një zbutje dhe përfundim të saj, kështu e ka kaluar edhe Mali i Zi pra nuk ka ndihma të USAID. Mund të ndodhë edhe në vendin tonë, pasi Shqipëria ka treguar progres. Unë nuk shoh ndonjë dramë të madhe edhe sikur të ndërpriten”, tha Pollo.
