Policia e Tiranës ka goditur një rast të shpërndarjes së drogave të forta në zonën e Astirit dhe ka arrestuar një 29-vjeçar.
Uniformat blu thonë se kishin informacione se i riu shpërndante lëndë narkotike kokainë e kanabis në këtë zonë. Për këtë arsye atij iu bë një kontroll fizik si dhe kontroll banese e biznesi.
Aty shërbimet e policisë sekuestruan dy qese plastike me lëndë narkotike të dyshuar kokainë, e ndarë në doza, gati për shitje, një sasi lëndë narkotike kanabis, 3 peshore që shërbenin për peshimin e lëndës narkotike dhe një sasi parash të dyshuara të përfituara nga shitja e lëndës narkotike.
“Arrestimi i këtij shtetas u bë pasi gjatë kontrollit fizik, kontrollit të banesës dhe të biznesit të tij, shërbimet e Policisë gjetën dhe sekuestruan në cilësinë e provës materiale dy qese plastike me lëndë narkotike të dyshuar kokainë, e ndarë në doza, gati për shitje, një sasi lëndë narkotike kanabis, 3 peshore që shërbenin për peshimin e lëndës narkotike dhe një sasi parash të dyshuara të përfituara nga shitja e lëndës narkotike”, njoftoi policia.
Materialet i kaluan Prokurorisë së Rrethit Gjyqësor Tiranë, për veprën penale “Prodhimi dhe shitja e narkotikëve”.
