Gjykata e Tiranës ka dhënë ditën e sotme vendimin për episodin e dhunës të regjistruar në Pallatin Mbretëror mes Princ Leka Zogut, ish-bashkëshortes së tij, Elia Zaharias dhe babait të kësaj të fundit Gjergj Zaharia.
Princ Leka është shpallur fajtor për veprën penale “dhunë në familje” dhe është dënuar me 1 vit burgim, ku për shkak të gjykimit të shkurtuar dënimi i ulet në 8 muaj burgim. Gjithsesi, ai nuk do të bëjë asnjë ditë burg, pasi Gjykata ia ka konvertuar dënimin në 16 muaj shërbim prove.
Fajtor për veprën penale “dhunë në familje” është shpallur edhe Gjergj Zaharia, babai i Elias, ku me gjykim të shkurtuar dënimi i zbret në 6 muaj e 20 ditë. Gjithsesi, as ai nuk do të përfundojë në qeli, pasi edhe për të Gjykata ka vendosur ti’a pezullojë dënimin me burg në 1 vit e 40 ditë me kusht.
Ndërkohë, Elia Zaharia, e cila ishte marrë e pandehur po ashtu për veprën penale “dhunë në familje”, Gjykata ka vendosur ta shpallë të pafajshme.
Vendimi është dhënë nga gjyqtarja Migena Laska, teksa kujtojmë se Prokuroria e Tiranës kishte kërkuar dënimin e Princ Lekës me 1 vit e 6 muaj burgim, 6 muaj burg për Elia Zaharian dhe 1 vit burg për babain e saj.
Dhuna mes tyre u regjistrua në 5 Mars të këtij viti, kur çifti ishte në proces divorci dhe Princ Leka kishte shkuar në Pallatin Mbretëror për të takuar vajzën e tij.
Fillimisht ai kishte nisur konfliktin me ish-vjehrrin e tij Gjergj Zaharia, ndërsa më pas ai filmoi me telefon momentin kur dhunohej nga Elia Zaharia. Ishte Princ Leka ai i cili bëri i pari kallëzim në Polici dhe pamjet të filmuara me telefonin e tij më pas u shpërndanë masivisht në media. Ndërkohë, Gjergj Zaharia pretendon se Princ Leka e ka goditur me një statujë dhe sipas Elias, kur ajo ka shkuar ka gjetur Princin duke dhunuar babain e saj.
- Dëshmia e Princ Lekës
“Unë jam paraqitur në Komisariatin e Policisë për të kallëzuar se sot rreth orës 15:20 minuta unë kam qenë në banesën time në rrugën “Murat Toptani’ rezidenca familjare mbretërore nr.6, Tiranë për të takuar vajzën time të moshës 3 vjeçe, pasi me ish bashkëshorten shtetasen Elia Zogu jemi ne proces divorci .Unë fillimisht jam takuar me shefin e administratës së oborrit shtetasin Syl Mulosmanaj të cilin e kam pyetur në lidhje me një dollap që ishte boshatisur në kundërshtim me marrëveshjen.
Më pas unë i kam kërkuar Sylës që të më shoqëronte deri tek vajza ime për ta takuar për të cilën me një marrëveshje për zgjidhje martese kemi rënë dakord me ish bashkëshorten. Unë jam ngjitur sipër së bashku me Sylen dhe kam gjetur vajzën time Geraldina Zogu e moshës 3 vjeç e cila ka qenë në shoqërinë e gjyshit të saj babait të ish bashkëshortes shtetasit Giergi Zaharia. Në këtë moment unë kam përqafuar vajzën time dhe shtetasi Gjergj Zaharia ka filluar me fjalë fyese dhe kërcënuese në drejtimin tim duke me thënë se si duhet të ndërrosh rrugë kur të më shikosh mua.
Reagimi im para kësaj situate ka qenë duke iu drejtuar Gjergjit që të mos ofendojë dhe kërcënojë sidomos në prani të vajzës edhe i kam kërkuar të largohej nga dhoma ku unë po qëndroja me vajzën .Në këto momente situata ka agravuar shtetasi Gjergji Zaharia më është afruar duke më shtyrë e goditur me shkelma tek këmbët e mia. Reagimi im ka qenë vetëm mbrojtës por Giergji ka vazhduar duke më goditur edhe më ka grisur xhupin si dhe ka marrë një send të fortë (statujë druri) me të cilën më ka goditur por unë jam mbrojtur me parakrah dhe jam goditur nga duart me të, më pas ka ardhur dhe ish bashkëshortja Elia Zogu e cila dhe ajo ka filluar që të më sulmoje fizikisht dhe duke më ofenduar dhe kërcënuar edhe ajo.
Unë kam tentuar që t’i largohem kësaj situate por gjatë largimit ish bashkëshortja ka vazhduar sulmin ndaj meje fizikisht edhe duke më kërcënuar më pas, kam dalë jashtë oborrit për t’u larguar i ndjekur nga ish bashkëshortja e cila ka vazhduar edhe në bulevard duke më ndjekur. Me pas jam paraqitur pranë komisariat Nr.1 për të bërë kallëzim penal pasi kërkoj ndjekje ligjore të këtij problemi”, thuhet në dëshmin e Princ Lekës.
- Dëshmia e Elia Zaharias
“Unë kam disa ditë që kam qenë pa qejf dhe për këtë arsye babai im ka ardhur për të më ndihmuar me vajzën time të vogël 3 vjeç dhe për të më ndihmuar edhe mua.
Sot unë kam qenë në prova, kam ikur ne shtëpi rreth orës 15:30 dhe kam parë biçikletën e babit tim të përmbysur, jam futur brenda në shtëpi në katin e dytë dhe kam dëgjuar debat mes babait dhe Lekës nuk e di se çfarë i thoshin njëri tjetrit, kam parë Lekën i cili po shtynte me forcë babanë tim.
Unë e kam tërhequr Lekën me qëllim që ta largoja nga babai im dhe debati me të dhe duke u tërhequr me njëri-tjetrin kemi zbritur deri poshtë nga shkallët në një moment kur dola jashtë Leka më ka shtyrë me gjithë forcën e tij derisa unë kam humbur ekuilibrin dhe jam rrëzuar përtokë duke u vrarë dhe në kokë, Leka filloj duke më thënë ‘je aktore po bën kot’.
Ndërkohë që kërkoi ndihmë ambulancën ose policinë shtetasi Syl Mulosmani me ka thënë që ambulanca dhe policia të lajmërohen nga babai jot Gjergji, ndërkohë që babai ishte akoma tek dhoma, Leka dhe Syla duke mos më dhënë asnjë ndihmë dhe më lanë në tokë, unë e kam mbledhur veten pasi kam ndenjur disa minuta përtokë, jam çuar vet duke mos më ndihmuar asnjë njeri edhe Leka ka vazhduar dhe më ka shtyrë dhe më pas ai është larguar”.
