Spanja pret që edhe më shumë turistë të dynden në vend në vitin 2025, pasi vlerësohet se 94 milionë të huaj vizituan vitin e kaluar, 10% më shumë se në vitin 2023, sipas Ministrisë së Turizmit.
Turistët e huaj shpenzuan rreth 126 miliardë euro (130 miliardë dollarë) gjatë qëndrimit të tyre në 2024, 16% më shumë se një vit më parë, tha ministria.
Sipas burimeve zyrtare, vizitorët priten të shpenzojnë 36 miliardë euro në katër muajt e parë të 2025-s, po ashtu 16% më shumë se në të njëjtën periudhë të vitit 2024, ndërsa numri i vizitorëve do të rritet me 9%.
Bumi turistik është bërë një burim tensioni në shumë pika të vizitorëve në mbarë vendin, me qytete si Barcelona që planifikojnë të mbyllin të gjitha qiratë afatshkurtra deri në vitin 2028 për të mbrojtur vendasit nga rritja e kostos së banesave.
Qeveria spanjolle po punon për të zbutur fluksin turistik, duke përmendur përparimin në vendosjen e rregullave dhe kufizimeve në akomodimin me qira për turistët.
“Ne duhet të këmbëngulim në dekoncentrimin e turizmit dhe kjo po ndodh,” thanë zyrtarë të ministrisë, duke shtuar se turizmi i qëndrueshëm mjedisor në Spanjë po konsolidohet.
Në tetor të vitit të kaluar, Banka e Spanjës tha në një raport se edhe pse shumica e treguesve të lidhur me turizmin po regjistronin rekorde të njëpasnjëshme, rritja e tyre po ngadalësohej.
Banka paralajmëroi gjithashtu për problemet që lidhen me turizmin e mbipopulluar, degradimin e burimeve natyrore dhe strehimin, si dhe bëri thirrje për një studim në lidhje me rritjen e mundshme të tarifave të turizmit.
