Erion Braçe nuk do të jetë më i angazhuar në zonën e Divjakës në Qarkun e Fierit për fushatën elektorale të zgjedhjeve parlamentare të 11 Majit.
Këtë vendim ai e ka marrë pas përplasjeve që ka patur me strukturat drejtuese të partisë në këtë Qark që drejtohet nga numri 2 i Qeverisë, Belinda Balluku.
Brenda Partisë Socialiste kanë nisur të qarkullojnë informacione se Erion Brace mund të zhvendoset në Tiranë. Gjithashtu, nuk përjashtohet mundësia edhe e vajtjes së tij në Berat, atje ku edhe nisi karrierën politike, teksa tashmë ky qark për socialistët drejtohet nga kryebashkiaku Ervin Demo.
Burime nga PS thanë për Tch se nëse Edi Rama do të vendosë të t’i besojë Erion Braçes Njësinë 5 e njohur si “Stalingradi” socialistëve në kryeqytet, atëherë mund të kemi çuarjen e Anila Denajt për tu kujdesur për zonën e Farkës.
Aktualisht Njësia 5 është nën “kujdestarinë” e ministres së Bujqësisë, Anila Denaj. Vetë Erion Braçe ditët e fundit nuk ka bërë asnjë koment për një lëvizje të mundshme nga Divjaka.
