Breshëria e kallashnikovit është zbrazur edhe mbrëmjen e sotme, duke lënë të tjera viktima. Një i ri është ekzekutuar brenda automjetit të tij në autostradën Fier-Vlorë.
Viktima është 30-vjeçari Kristjan Marku alias Kristjan Bardhi nga Rrësheni, një person me precedent penal. Ai ka qenë duke udhëtuar i vetëm me një automjet tip “Volkswagen” në drejtim të Vlorës në momentin kur është qëlluar me breshëri kallashnikovi nga persona ende të paidentifikuar.
Ngjarja ka ndodhur rreth orës 18:15 sapo kalon rreth-rrotullimin e fshatit Novoselës, teksa në momentin e atentatit ka patur edhe makina të tjera në autostradë janë përpasur me njëra-tjetrën për shkak të frenimit të papritur.
Disa minuta pas atenatit, në një distancë jo shumë të largët nga vendi i ngjarjes është gjetur dhe një mjet tip “Volkswagen Golf” në djegie e sipër që dyshohet se iu përket autorëve.
Nga hetimet paraprake, dyshohet se kanë qenë tre autorë, të cilët pasi kanë djegur automjetin, janë ndihmuar nga persona të tjerë për t’u larguar, dyshohet në drejtim të Fierit, duke u kthyer tek rrethrrotullimi i Panamasë.
Ende nuk dihet arsyeja pse i riu nga Rrësheni po udhëtonte drejt Vlorës. Policia ka ngritur disa pika kontrolli dhe po vijon krehja e zonës për të bërë të mundur identifikimin dhe kapjen e autorit/autorëve.
Gjithashtu, është bllokuar edhe njëri aks i autostradës, vendi ku ndodhi atentati, pasi ekspertët po mbledhin gëzhojat dhe po bëjnë kqyrjen e vendit të ngjarjes.
E shkuara kriminale e Kristjan Markut
Kristjan Marku është një person me precedent penal për “Vrasje me dashje ne bashkepunim mbetur ne tentative” dhe “Mbajja pa leje e armeve te zjarrit dhe municionit luftarak”.
Më konkretisht, ai ka qenë i përfshirë në ngjarjen e regjistruar mbrëmjen e 26 Marsit në Rrëshen, ku u qëllua me armë zjarri në drejtim të automjetit të Sajmir Reçit, nipi i Kastriot Reçit, i vrarë në Janar të vitit 2020.
Për ngjarjen e 26 Marsit 2023, Kristian Marku (Bardhi) u akuzua si autor bashkë me kushëririn e tij, Enrik Bardhi (Marku), teksa një ditë pas ngjarjes Policia arrestoi vetëm babain e këtij të fundit, Martin Bardhi alias Marku.
Ky i fundit u ekzekutua në lokalin e tij që ndodhet në hyrje të spitalit të Rrëshenit, 50 metra përballë komisariatit të qytetit, më 26 shtator të vitit 2023, sapo kishte dalë nga burgu për ngjarjen e Marsit të po atij viti.
Ndërkohë, po në shtator të vitit 2023, Kristian Marku u arrestua në kuadër të operacionit “Tentativa”, pasi sapo ka parë shërbimet e Policisë, ka hedhur nga dritarja e automjetit, një armë zjarri pistoletë me fishekë në të, të cilën e posedonte pa leje.
Edhe vrasja e sotme e Kristjan Markut dyshohet se është pjesë e hakmarrjeve mes visese në Rrëshen.
Njoftimi i policisë:
Rreth orës 18:15, në afërsi të fshatit Novoselë, në autostradën Fier-Vlorë, është qëlluar me armë zjarri në drejtim të një automjeti tip “”, me drejtues shtetasin K. M., 30 vjeç, i cili ka humbur jetën.
Në vendngjarje kanë shkuar shërbime të Policisë së DVP Vlorë dhe grupe të Forcës Kombëtare të Sigurisë Njësia Fier. Vijon krehja e zonës dhe kontrollet për kapjen e autorëve.
Është ngritur një grup i posaçëm hetimor dhe, nën drejtimin e Prokurorisë, vijojnë intensivisht hetimet për zbardhjen e rrethanave dhe sigurimin e provave, me qëllim dokumentimin ligjor të ngjarjes, identifikimin dhe kapjen e autorit/ve.
