Mbrëmjen e së dielës Tirana u trondit nga një ekzekutim mafioz.
Personi që shihni në foto është 56-vjeçari Bujar Nasufi, i cili u ekzekutua gjatë orëve të mbrëmjes të së dielës tek zona e Pallatit me Shigjeta në Tiranë.
Ngjarja e rëndë ndodhi rreth orës 20:40, ku 56-vjeçari u qëllua me gjashtë plumba, dy prej të cilave e kishin kapur në gjoks duke i shkaktuar dhe vdekjen.
Ai sapo kishte ndaluar makinën dhe po hynte në derën e banesës. Autori dyshohet të ketë qenë i vetëm dhe ka qëlluar me pistoletë në xhamin ballor dhe anësor të makinës së viktimës. Në momentin e ngjarjes Nasufi në automjet ndodhej së bashku me bashkëshorten e tij.
Viktima sipas policisë nuk ka pasur kurrë probleme. Edhe fqinjët janë shprehur se ka qenë person i qetë dhe nuk kishte konflikte, as nuk ruhej dhe bënte një jetë normale.
Menjëherë pas ngjarjes autori u largua në drejtim të zonës së “Selitës” me një motor ngjyrë të zi.
Që prej mbrëmjes së djeshme policia po punon për identifikimin dhe kapjen e autorit të atentatit, por deri më tani nuk ka asnjë shenjë nga ai.
Sakaq, ashtu si dhe raportuam ditën e djeshme viktima ka qenë një person jo problematik dhe nuk figuron të ketë pasur probleme me drejtësinë. Edhe fqinjët janë shprehur për mediat se ai ka qenë person i qetë dhe nuk kishte konflikte, as nuk ruhej dhe bënte një jetë normale.
“Më datë 12.01.2025, rreth orës 20:40, tek “Pallati me Shigjeta” në rrugën “Myrte Zeneli”, është qëlluar me armë zjarri në drejtim të një automjeti me drejtues shtetasin B.N, rreth 56 vjeç, i cili si pasojë ka humbur jetën.
Një grup i posaçëm hetimor, nën drejtimin e Prokurorisë, ndodhet në vendngjarje dhe vazhdon punën për sqarimin e rrethanave të ngjarjes, identifikimin dhe kapjen e autorit/ëve të dyshuar.
Shërbimet e Policisë kanë ngritur pika kontrolli dhe po ushtrojnë kontrolle në zonë për kapjen e autorit. Informacion më të detajuar mbi këtë ngjarje do të japim në vijim pas veprimeve hetimore paraprake”, njofton policia.
- Hetimet
Ka qenë një telefonatë e shkuar në sallën operative që ka lajmëruar për një plagosje në zonën e Selitës.
Policia që ka shkuar në vendin e ngjarjes pasi ka ngritur planin e masave ka rrethuar zonën dhe më pas edhe gjithë Tiranën. Dyshohet se një motor i zi, që ka karakteristikat e mjetit që dyshohet që u pa në vendin e ngjarjes kishte marrë drejtimin e Selitës, ndërkohë që policia sërish mblodhi vetëm gëzhojat në vendin e ngjarjes. Autori ose autorët e kanë pritur Nasufin në afërsi të shtëpisë, vend ku ai ka ulur shpejtësinë e mjetit pasi do të futej në portën e jashtme të banesës së tij.
Policia e Shtetit bën me dije se viktima është një person tërësisht i panjohur për ta pasi ai nuk rezulton me asnjë precedent të mëparshëm penal. Po ashtu, bëhet fjalë se as nga familja e tij nuk ka ndonjë person problematik, por mënyra se si është kryer atentati lë të dyshohet se vrasja është e një stili mafioz dhe e mirorganizuar.
Grupi hetimor që ka marrë në duar ngjarjen kërkon të zbulojë shkaqet pikërisht tek e shkuara e viktimës dhe e njerëzve të tij të afërt për të mësuar se cili ka qenë motivi i ekzekutimin të mbrëmshëm
