Seksioni i narkotikëve në Policinë e Korçës ka finalizuar një operacion për goditjen e një rasti të shitjes së lëndëve narkotike në doza.
Si rezultat, në kuadër të operacionit të koduar “Crackman” është arrestuar shtetasi Florenc Banushi, 32 vjeç, banues në Tiranë.
Pas informacioneve të marra, uniformat blu raportohet se kanë ndaluar në aksin rrugor “Pogradec-Qafë Thanë”, automjetin më të cilin dyshohej se qarkullonte 32-vjeçari. Gjatë kontrollit fizik ndaj Florenc Banushit dhe kontrollit në automjet, efektivët kanë gjetur sasi lënde narkotike kokainë, që dyshohet se ai e posedonte me qëllim shitjen në doza.
Sasia e kokainës është sekuestruar në cilësinë e provës materiale, teksa materialet procedurale i kanë kaluar Prokurorisë së Korçës për veprime të mëtejshme, për veprën penale “Prodhimi dhe shitja e narkotikëve”.
