Një “çerdhe” prostitucioni është goditur nga Policia e Durrësit, në një ambient të marrë me qira.
Si rezultat janë shpallur në kërkim dy shtetase kineze, të cilat dyshohet se kanë qenë në rolin e tutoreve, si dhe janë vënë nën hetim 7 persona të tjerë, dy kineze që ushtronin prostitucionin dhe 4 djem.
Aksioni është ndërmarrë nga blutë e qytetit bregdetar pas një hetimi 1-mujor me metoda proaktive. Në kuadër të operacionit të koduar “Storm 2” janë shpallur në kërkim shtetaset L. L., 38 vjeçe dhe D. Zh., 46 vjeçe, banuese në Kinë, të akuzuara për veprat penale “Shfrytëzimi i prostitucionit”, “Prostitucioni” dhe “Trafikimi i personave të rritur”
Ndërkohë, ka nisur procedimi penal për veprën penale “Prostitucioni”, për shtetasit: L. L., 42 vjeçe dhe L. Y., 35 vjeçe, të dyja banuese në Kinë; M. B., 21 vjeç, banues në Gjermani; J. D., 30 vjeç, R. A., 24 vjeç, J. L., 34 vjeç dhe A. L., 29 vjeç, të gjithë banues në Durrës.
“Nga hetimet e kryera dyshohet se 2 shtetaset kineze të shpallura në kërkim shfrytëzonin për prostitucion, 2 shtetaset e tjera kineze, në ambientin që e kishin marrë me qira këto 2 të fundit. Në cilësinë e provës materiale u sekuestruan shuma parash të përfituara nga prostitucioni, 7 celularë, 2 pasaporta dhe sende të tjera.” – thuhet në njoftimin e Policisë.
Materialet procedurale i kaluan Prokurorisë së Durrësit për veprime të mëtejshme.
