Ermal Hoxha, nipi i diktatorit Enver Hoxha, është paraqitur mesditën e të hënës në Prokurorinë e Posaçme (SPAK).
Lajmi konfirmohet nga burime për mediat, teksa SPAK nuk ka dhënë detaje se përmes Ermal Hoxha është thirrur për të dëshmuar para oficerëve të BKH-së.
Ermal Hoxha mund të jetë thirrur në lidhje me dosjen e laboratorit të kokainës në Xibrakë, e rihapur vitin e kaluar nga SPAK, me kërkesë të kreut të grupit parlamentar të PD-së, Gazment Bardhi, për vijimin e hetimeve për identifikimin e personit të paidentifikuar të grupit.
Nipi i diktatorit Enver Hoxha ka qenë një prej anëtarëve të bandës së laboratorit të kokainës në Xibrakë dhe është dënuar me 6 vite e 8 muaj burg për trafik narkotikësh mbetur në tentativë.
Sipas Gazment Bardhit, personi i paidentifikuar në grupin e laboratorit të kokainës në Xibrakë dyshohet se është Olsi Rama, vëllai i kryeministrit Edi Rama.
Olsi Rama ka shkuar dy herë në SPAK për të dhënë sqarime në lidhje me këtë çështje, ku prezenca e fundit e tij në Prokurorinë e Posaçme ishte më 12 Korrik 2024, ku qëndroi për rreth 50 minuta.
“Po për atë çështje (Xibrakën). Edhe dhashë shpjegimet e mia. Si person në dijeni për të thënë gjera që duhet thënë. Për ato gjëra që keni pyetur ju sqarova situatën dhe nuk kam gjë për të shtuar.” – tha shkurtimisht Olsi Rama atë ditë për gazetarët pas daljes nga SPAK.
Vlen të theksohet fakti se Olsi Rama e paditi për “kallëzim të rremë” Bardhit në lidhje me akuzat ndaj tij për “Xibrakën”, por prokurori i SPAK, Elvin Gokaj, më datë 17 Prill 2024 vendosi për mosfillimin e procedimit penal për kallëzimin e tij.
Sipas denoncimit të Bardhit, një person i paidentifikuar, i moshës 45 vjec, rezulton të ketë përdorur automjetin me targa AA 653 DM. Sipas të dhënave TIMS, Olsi Rama është përdorues i këtij automjeti, së bashku me tre drejtuesit e tjerë të organizatës kriminale.
Bardhi iu referua dokumenteve të Prokurorisë së Krimeve të Rënda dhe të dhënave të sistemit TIMS për të provuar sipas tij faktin se Olsi Rama ka përdorur gjatë vitit 2014 të njëjtën makinë me të dënuarit e tjerë të dosjes “Xibraka”, ku policia zbuloi atë kohë një laborator të përpunimit të kokainës në fshatin me të njëjtin emër.
Sipas Bardhit, filli lidhës mes Ramës dhe anëtarëve të tjerë të grupit ishte makina me targa AA 653DM, e përdorur prej tyre dhe e regjistruar në sistemin TIMS në hyrjet dhe daljes nga vendi.
Dokumentet e TIMS të vëna në dispozicion nga Bardhi tregojnë se Olsi Rama ka hyrë në territorin e Shqipërisë tre herë me këtë makinë më 8 qershor 2014, 13 korrik 2014 dhe 8 gusht 2014; respektivisht nga pikat kufitare të Kapshticës, Qafë Thanës dhe Qafë Botës. E njëjta makinë është përdorur disa herë nga Gentian Gjonaj nga prilli deri në nëntor të vitit 2014 dhe nga Ermal Hoxha, nipi i ish-diktatorit Enver Hoxha, në nëntor 2014.
Sipas Bardhit, prokuroria dhe gjykata shqiptare kanë pranuar se personat e dënuar nuk janë të vetmit persona që kanë qenë të përfshirë në këtë veprimtari kriminale, por një hetim për personat e paidentifikuar nuk është mbyllur ende përfundimisht.
Në mars të vitit 2016, Prokuroria e Krimeve të Rënda e ka ndarë më vete procedimin për bashkëpunëtorët e paidentifikuar, që sipas Bardhit ishte vetëm një i tillë, i diktuar nga shërbimet e vëzhgimit si drejtues i makinës së mësipërme dhe i përshkruar në dokumentet e prokurorisë si “45-vjeçar me flokë të shkurtra”.
Hetimi për grupin e përfshirë në laboratorin e prodhimit të kokainës në Xibrakë nisi në dhjetor 2014, pas informacioneve të mbërritura në Shqipëri nga autoritetet gjermane. Në janar 2015, Prokuroria e Krimeve të Rënda vuri nën akuzë 9 persona për trafikim të lëndëve narkotike dhe krijim të grupit të strukturuar kriminal.
Prokuroria e Krimeve të Rënda akuzoi Genci Xhixën si drejtues të grupit kriminal të përfshirë në laboratorin e kokainës, por ai nuk u arrestua asnjëherë nga policia. Anëtarët e grupit u dënuan me 104 vjet burg nga Gjykata e Krimeve të Rënda, por dënimet u lehtësuan në Apel dhe disa prej tyre, si në rastin e Ermal Hoxhës dolën më herët nga burgu për “sjellje të mirë”.
Në lidhje me akuzat ndaj Olsi Ramës, Gazment Bardhi kërkoi një interpelancë në Kuvend me kryeministrin Edi Rama, por ky e fundit e refuzoi, madje socialistët me në krye kryeparlamentaren Lindita Nikolla e rrëzuan kërkesën që në Këshillin e Mandateve.
Kryeministri Edi Rama ka deklaruar se nëse vëllai i tij, Olsi Rama del trafikant droge, atëherë do të largohet nga politika, por në të kundërt, do të padisë Bardhin për shpifje.
