Policia e Tiranës ka zbuluar një qendër “Call Center-i” në kryeqytet, të cilët mashtronin shtetas të huaj, nëpërmjet telefonit, për të investuar në bursa fiktive. Si rezultat janë arrestuar pronarin dhe administratorin e saj.
Në kuadër të operacionit policor të koduar “Fake Promise” janë arrestuar shtetasit Olisjo Planaj, 22 vjeç, banues në Tiranë, pronari i një “Call Center-i” dhe Erdi Muça, 25 vjeç, administratori i “Call Center-i”.
Gjithashtu, autoritetet policore kanë proceduan në gjendje të lirë dhe shtetaset J.B, 36 vjeçe, S.Gj, 27 vjeçe, dhe Xh.M, 30 vjeçe, të punësuar si operatore në këtë subjekt.
“Nga veprimet hetimore ka rezultuar se shtetasi Erdi Muça, 25 vjeç, administronte një subjekt privat call center, me pronar shtetasin Olisjon Planaj, në rrugën e Dibrës. Në këtë subjekt të paregjistruar në organet kompetente ishin të punësuar si operatorë shtetaset e lartpërmendura, të cilët, së bashku me administratorin, telefononin shtetas të huaj, dhe u prezantoheshin si agjentë shitjesh dhe përmes mashtrimit, i bindnin ata që të investonin në faqen “Coin Tracking” faqe kjo ku gjendeshin fondet që ishin rekuperuar. .
Gjatë operacionit u sekuestruan në cilësinë e provës materiale, 5 njësi kompjuterike, 7 aparate celulare dhe lista me të dhëna të ndryshme të shtetasve të huaj që dyshohet se janë mashtruar, për të investuar në bursa fiktive.” – thuhet në njoftimin e Policisë.
Materialet proceduriale i kaluan Prokurorisë së Tiranës për veprime të mëtejshme procedurale.
