Kongresi Amerikan certifikoi zyrtarisht fitoren e presidentit të zgjedhur Donald Trump në zgjedhjet e nëntorit 2024, duke e çuar atë një hap më pranë marrjes së zyrës Ovale në fund të këtij muaji.
Për ironi të fatit, Zëvendëspresidentja Kamala Harris drejtoi mbledhjen dhe ka qenë ajo që zyrtarisht shpalli përfundimisht fitoren e rivalit të saj në zgjedhjet presidenciale.
“Votat për president të Shteteve të Bashkuara janë si më poshtë: Donald J Trump i shtetit të Floridës ka marrë 312 vota. Kamala D Harris e shtetit të Kalifornisë ka marrë 226 vota”, tha ajo duke lexuar rezultatin.
Pas fjalës së saj, duartrokitje të forta shpërthyen nga republikanët.
Para mbledhjes, Kamala Harris publikoi një videomesazh duke thënë: “Transferimi paqësor i pushtetit është një nga parimet më themelore të demokracisë amerikane. Ashtu si çdo parim tjetër, është ajo që e dallon sistemin tonë të qeverisjes nga monarkia apo tirania”.
