Kreu i Partisë së Lirisë, Ilir Meta do të merret nesër në pyetje nga SPAK, në lidhje me dosjen ndaj tij, ku akuzohet për kryerjen e tre veprave penale. Burime për mediat bëjnë me dije se Meta do të merret në pyetje nga oficerët e BKH-së në orën 10:00, si person nën hetim.
Ish-Presidenti i Republikës ndodhet në paraburgim, që prej 21 Tetorit, të vitit të kaular, kur u arrestua dhunshëm nga Policia në mes të ditës, në hyrje të Tiranës, pranë “Casa Italia-s”. Ai ndodhet në paraburgimin e burgut “313” në Tiranë, teksa masa e sigurisë ndaj tij është konfirmuar edhe nga Gjykata e Posaçme e Apelit.
Ilir Meta akuzohet akuzohet për çështjen CEZ-DIA, për kontratat e konsulencës dhe lobimit në Shtetet e Bashkuara të Amerikës, pastrimin e produkteve të veprës penale në blerjen e një shtëpie në Tiranë si dhe mosdeklarimin e shpenzimeve mjekësore për periudhën 2013-2019.
Ndaj Ilir Metës rëndojnë akuzat për veprat penale “Korrupsioni pasiv i funksionarëve të lartë shtetërorë ose të zgjedhurve vendorë” në 3 (tre) raste nga të cilat në dy raste është kryer në bashkëpunim, “Pastrimi i produkteve të veprës penale ose veprimtarisë kriminale” e kryer në bashkëpunim dhe më shumë se një herë, dhe “Refuzimi për deklarim, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë, ose i cdo personi që ka detyrimin ligjor për deklarim”.
Vlen të theksohet fakti se ditën e sotme u paraqit në SPAK edhe bashkëshortje e Metës, me të cilën është në proces divorci, deputetja Monika Kryemadhi, si dhe mamaja e kësaj të fundit, Fatime Kryemadhi.
Veç Kryemadhit, për dosjen në fjalë janë nën masën detyrim paraqitje dhe ish-kreu i AKEP, Pirro Xhixho si dhe shtetasja Ema Çoku.
