Gjykata e Tiranës ka liruar nga burgu 21-vjeçarin Rei Bitri, i cili në orët e para të mëngjesit të së enjtes përplasi një efektiv të Policisë së patrullës në shërbim.
Ndaj tij është caktuar masa e sigurisë “detyrim paraqitje”, teksa i riu ka deklaruar para togave të zeza se polici i kishte dalë papritur përpara dhe nuk e kishte parë.
Ndërkohë, Prokuroria e Tiranës është duke pritur rezultatet e ekspertizës nga spitali ku po mjekohet efektivi i Policisë, i cili mbeti i plagosur. Gjatë seancës gjyqësore është pretenduar se paraprakisht polici ka dëmtime të lehta në këmbë dhe ndodhte jashtë rrezikut për jetën.
Prokuroria ka marrë edhe dëshmitë e dy efektivëve të tjerë që kanë qenë në shërbim së bashku me policin e plagosur në rrugën “Xhanfize Keko” në momentin kur ndodhi përplasja.
Rei Bitri ka qenë duke udhëtuar me mjetin e tij privat, kur efektivi I ka urdhëruar të hapë krahun, moment kur 21-vjeçari e ka aksidentuar duke e lënduar në këmbë policin.
