Është caktuar ditën e sotme me short gjyqtari i Gjykatës së Apelit të Posaçëm që do të shqyrtojë ankimimin e SPAK, të cilët kundërshtuan vendimin e gjyqtares së GJKKO-së Floreja Davidhi kundër lirimit të kryedemokratit Sali Berisha nga masa “arrest në shtëpi”.
Gjyqtari që do të marrë vendimin mbi këtë çështje do të jetë Ergert Pëllumbi, i cili vendosë nëse do të rrëzojë vendimin e Davidhit për revokimin e masës ndaj Berishës apo do ta lerë në fuqi.
Flojera Davidhi më 27 Nëntor i revokoi masën e sigurisë “arrest shtëpie” Sali Berishës në lidhje me hetimet për privatizimin e ish-kompleksit sportiv “Partizani”, por ky vendim nuk u pranua nga dy prokurorët e çështjes Arben Kraja dhe Enkeleda Millonai.
Sali Berisha ndodhej në izolim që prej 30 Dhjetorit të vitit 2023, kur Gjykata e Posaçme vendosi t’i caktonte masën e sigurisë “arrest shtëpie”, pasi lideri demokrat nuk zbatoi masën e mëparshme “Detyrim paraqitje”, duke e konsideruar si antikushtetuese.
Pas këtij vendimi, avokatët e Berishës kanë bërë një sërë ankimimesh për t’i revokuar masën “Arrest shtëpie”, por kërkesat e tyre janë rrëzuar si në Shkallën e Parë, po ashtu edhe në Apelin e Posaçëm.
Për çështjen në fjalë Berisha është marrë i pandehur për akuzën e veprës penale “Korrupsion pasiv i funksionarëve të lartë shtetërore ose të zgjedhurve vendorë”, kryer në bashkëpunim.
Sipas SPAK-ut, Berisha në kohën kur ka qenë kryeministër ka vendosur në funksion të interesave të dhëndrit të tij Jamarbër bazën ligjore, si edhe ka ushtruar presion mbi vartësit për të nxitur plotësimin sa më të shpejtë të procedurave të kthimit të pronës dhe privatizimit të godinave të degraduara të ish-klubit sportiv “Partizani”.
