Ish-kreu i Bashkisë së Shkodrës dhe ish-deputeti i PD-së, Bardh Spahia ka dalë pas rreth 1 ore nga ambientet e Prokurorisë së Posaçme (SPAK), ku u paraqit mëngjesin e kësaj të marte i shoqëruar nga avokati i tij.
Ende nuk dihe se për çfarë ka dëshmuar Spahia para oficerëve të BKH-së. I pyetur nga gazetarët pas daljes nga SPAK, ish-kryebashkiaku nuk dha detaje konkrete, por tha se çështja e tij nuk ka interes publik dhe sipas tij, nuk ka lidhje as me korrupsionin dhe as me krimin e organizuar.
“S’ka interes publik. Është një deklaratë që nuk ka lidhje me korrupsion, as me krimin e organizuar, as me para të pista, asgjë. Nuk ka interes për opinionin publik”, tha shkurtimisht Bardh Spahia për gazetarët.
Kjo është hera e dytë që Bardh Spahia paraqitet në Prokurorinë e Posaçme. Ai u paraqit në SPAK edhe mëngjesin e 2 tetorit, ku qëndroi për rreth 30 minuta dhe po ashtu, ishte i shoqëruar nga avokati i tij.
Më 26 Mars të këtij viti u kallëzua në SPAK bashkë me 21 kryebashkiakë të tjerë, për “shpërdorim detyre” në fushatën elektorale të 14 Majit. Mes tyre ka qenë edhe emri i Bardh Spahisë, por nuk dihet nëse ish-zyrtari i lartë vendor është thirrur në lidhje me këtë denoncim.
Bardh Spahia mbajti detyrën e kryetarit të Bashkisë së Shkodrës nga 31 marsi 2022 deri në vitin 2023, kur në zgjedhjet vendore të 14 Majit fitues u shpall kandidati i Partisë Socialiste, Benet Beci
