Kryetari i Partisë Demokratike, Sali Berisha pas përfundimit të protestës së opozitës ka shkuar në Spitalin e Traumës, ku ndodhet për ndihmë mjekësore, deputeti Agron Gjekmarkaj.
Pas daljes nga spitali, Berisha ka reaguar lidhur me deklaratën e Policisë së Shtetit në të cilën mohohet të jetë ushtruar dhunë ndaj deputetit Gjekmarkaj.
Sipas Berishës, ai jo vetëm u dhunua, por kanë qenë 15 efektivë që e kanë rrahur deri sa i shkaktuan gjendjen e të fiktit.
“Zoti Gjekmarkaj është dhunuar në mënyrën më të pakonceptueshme nga 15 narko-komisar dhe policë. Po si mund të rrethohet një njeri, një deputet, një nënkryetar parlamenti nga 15 efektivë?
Ata e kanë qëlluar, se ndryshe pse do humbiste ndjenjat ai? Ata e kanë qëlluar dhe kur humbi ndjenjat ai e kuptuan se çfarë bën. Akti është një krim publik i përsëritur. Që të marrësh e të rrëmbesh Agron Gjekmarkaj si protestuesin më agresiv, tallesh me veten tënde. Ka qenë porosi e Edi Ramës, sjellja ndaj tij”,-tha Berisha.
