Policia e Durrësit në zbatim të vendimit të Gjykatës së Posaçme ka sekuestruar pasuritë e paluajtshme të Alket Hatijas dhe familjarëve të tij, i dënuar me 20 vite burg në Itali për trafik droge.
Konkretisht pasuritë e paluajtshme të cilat Hatija i kishte regjistruar në emër të vet dhe të familjarëve të tij, janë: 1 sipërfaqe toke truall, 1 garazh dhe 1 apartament në Durrës, si dhe 1 apartament në Kavajë.
“Në kuadër të operacionit policor të koduar “Konfiskimi”, policia ka ekzekutuar vendimin e Gjykatës së Posaçme për Korrupsionin dhe Krimin e Organizuar, për konfiskimin e disa pasurive të paluajtshme të cilat ky shtetas i kishte regjistruar në emër të vet dhe të familjarëve të tij, konkretisht: 1 sipërfaqe toke truall, 1 garazh dhe 1 apartament në Durrës, si dhe 1 apartament në Kavajë.
Shtetasi Alket Hatija, gjatë periudhës 2003-2004, ka kryer veprimtaritë kriminale të mbajtjes, shitjes dhe trafikimit të lëndës narkotike heroinë, nga Shqipëria në Itali. Ai ka trafikuar nga Shqipëria në Itali, me bashkëpunëtorët e tij, nëpërmjet automjeteve të transportit ndërkombëtar, sasi të mëdha droge (rreth 10 kg heroinë për çdo rast). Materialet procedurale i kaluan Prokurorisë, për veprime të mëtejshme”, njofton policia.
- Kush është Alket Hatija?
Hatija i njohur edhe si “Zoti i drogës”, është i dënuar në Itali për trafik të lëndëve narkotike.
Alket Hatija akuzohet se gjatë periudhës 2003-2004, ka kryer veprimtaritë kriminale të mbajtjes, shitjes dhe trafikimit të lëndës narkotike heroinë, nga Shqipëria në Itali.
Ai ka trafikuar nga Shqipëria në Itali, me bashkëpunëtorët e tij, nëpërmjet automjeteve të transportit ndërkombëtar, sasi të mëdha droge (rreth 10 kg heroinë për çdo rast). Por sasitë në total mund të shkonin edhe mbi 400 kilogramë të dokumentuara nga përgjimet dhe hetimet.
