Tarifat amerikane të paralajmëruara nga presidenti i zgjedhur Donald Trump do të ndikojnë në ekonominë evropiane. Kjo u bë e ditur nga Presidentja e Bankës Qendrore Evropiane e cila ka paralajmëruar se aplikimi i tyre mund të çojnë në rritje të çmimit të energjisë dhe të mallrave.
Në një konferencë shtypi në Vilnius, Christine Lagarde theksoi se banka do të vazhdojë të shkurtojë normat e interesit, por mbetet e shqetësuar për rritjen ekonomike.
Ndërsa inflacioni vijon të bjerë drejt objektivit prej 2 për qind, Lagarde sqaroi se ka rreziqe të shumëllojshme.
“Një rrezik negativ mund të jenë disa nga zhvillimet gjeopolitike, duke përfshirë ndryshimin e politikave amerikane në lidhje me tregtinë”, tha Christine Lagarde.
Këto tensione mund të çojnë në rritje të çmimit të energjisë dhe të mallrave. Presidenti i zgjedhur Donald Trump është zotuar se do të aplikojë tarifa nga 10 në 20 për qind për të gjitha importet.
