Analisti Fatos Lubonja ka deklaruar se gjatë mandatit të tretë të Edi Ramës ka një rënie në të gjithë treguesit, dhe kjo sipas tij matet me ikjen e shqiptarëve nga vendi.
Përsa i takon situatës së rendit dhe sigurisë, Lubonja theksoi se mund të mungojnë vjedhjet e xhepave dhe biçikletave siç ndodhte në vitet ’90, por në anën tjetër shohim policinë, shtetin të përfshirë me krimin e organizuar.
Lubonja tha se dy rrugë janë, ose do të pasurohesh si këta në mënyrë të paligjshme, duke u bërë pjesë e bandave ose me to, ose do të ikësh nga vendi, sikundër ka ndodhur me shumicën e shqiptarëve.
“Shteti ka dështuar, kemi shqiptarë që po vriten, kemi shqiptarë që kanë dështuar sepse ka dështuar ai në krye të shtetit”, tha Lubonja.
Ai tha se si Edi Rama dhe Sali Berisha duhej të kishin ikur me kohë në shtëpi, iu është dhënë mundësia për t’i bërë mirë shqiptarëve dhe i kanë bërë keq.
“Edi Rama dhe Sali Berisha as partitë e tyre nuk lejuan që të nxjerrin figura të reja”, tha Lubonja, duke theksuar se të dy e kanë kalëruar sistemin.
