Policia e Tiranës ka arrestuar një të ri, i cili ka grabitur nën kërcënimin e një thike një automjet në kryeqytet. Në kuadër të operacionit policor të koduar “Grab” është vënë në pranga shtetasi I. L., 32 vjeç, banues në Durrës.
Burimet zyrtare bëjnë me dije se 32-vjeçari ditën e djeshme në bulevardin “Bajram Curri”, kishte hyrë në një mobileri dhe në kërcënimin e një mjeti prerës, ka vjedhur çelësin e një automjeti i cili ishte i parkuar në hyrje të mobilerisë.
“Ditën e djeshme, ky shtetas dyshohet se ka hyrë në një mobileri dhe në kërcënimin e një mjeti prerës, i ka vjedhur një shtetasi çelësin e automjetit të cilin e kishte parkuar në hyrje të mobilerisë. Automjeti u gjet i braktisur në rrugën “Babë Rexha” dhe u sekuestrua në cilësinë e provës materiale.” – thuhet në njoftim.
Materialet procedurale i kaluan Prokurorisë së Tiranës për veprime të mëtejshme.
