Edi Rama ka bërë të tjera ndryshime sa i përket drejtuesve politik të Qarqeve. Burime bëjnë me dije se gjatë mbledhjes së sotme të Kryesisë së PS-së është zyrtarizuar ministri i Mbrojtjes, Pirro Vengu si drejtues politik në Vlorë.
Pirro Vengu do të jetë ndihmës i Bledi Çuçit, duke e bashkëdrejtuar së bashku Qarkun e Vlorës. Çuçi ishte caktuar që në Asamblenë e shtatorit si drejtues qarku në Vlorë dhe nuk dihet pse Rama ka marrë vendimin për t’i çuar një ndihmës.
Nga postimet në rrjetet sociale, Pirro Vengu kuptohet se e ka nisur prej disa ditësh punën si drejtues politik në Vlorë, por ditën e sotme u bë zyrtarizimi i tij.
Ndoshta, Rama ka marrë informacion se Çuçi mund të jetë i radhës që mund të goditet nga drejtësia, teksa kjo mbetet për t’u parë. Disa muaj më parë, Çuçi dëshmoi në Prokurorinë e Beratit për vjedhjen e 500 ton metaleve në Kombinatin Mekanik të Poliçanit.
Ndërkohë, Pirro Vengu ka vetëm pak muaj si ministër, pasi më herët ka mbajtur postin e drejtorit të Autoritetit Portual të Durrësit, vartës i Belinda Ballukut, e cila është drejtuese politike në Fier.
Më herët raportuam se në mbledhjen e sotme, Edi Rama zyrtarizoi dhe emërimin e Blendi Klosit si drejtues politik i PS-së në Qarkun e Dibrës. Në këtë post ai do të zëvendësojë Blendi Gonxhen, i cili është trasnferuar si drejtues politik i PS në Tiranë, ku do të mbulojë zonën e Kombinatit. Si Klosi dhe Gonxhe kanë nisur prej ditësh punën në detyrat e re, por sot do të bëhet zyrtarizimi nga Kryesia.
Bashkë me Blendi Gonxhen, numri i drejtuesve politik të PS-së në Tiranë shkon në 4 bashkë me Erion Veliajn, Ogerta Manastirliun dhe Elisa Spiropalin, ku kjo e fundit është caktuar për të mbuluar bashkitë e vogla si Rrogozhina, Vora dhe Kavaja. Vendimi për ta transferuar Gonxhen në Tiranë, kryesocialisti Edi Rama e ka marrë pas avancimit të hetimeve të SPAK ndaj kryebashkiakut Erion Veliaj.
Ndërkohë, gjatë mbledhjes së sotme, kanë qenë të lidhur online edhe kryebashkiakët socialist, ku siç duket, Edi Rama vazhdon akoma ta ketë shqetësim votën e diasporës.
Burime bëjnë me dije se Rama iu ka kryebashkiakëve më shumë angazhim për votën e diasporës. Kujtojmë se ditët e fundit janë publikuar denoncime ku administratës po i bëhet presion, pasi duhet të plotësojnë formularë me emra emigrantësh.
