Një krim në familje është parandaluar këtë të shtunë në kryeqytet, ndërsa në pranga është vënë 65-vjeçari me inicialet Sh. V. Policia e Tiranës bën të ditur se ky shtetas është kapur dhe arrestuar në flagrancë, pasi kishte dhunuar bashkëshorten e tij dhe e kanoste atë se do ta vriste.
Ngjarja ka ndodhur në rrugën “Tomi Kristo”, ndërsa unfiromat blu janë njoftuar nga persona të tjerë se 65-vjeçari, po ushtronte dhunë ndaj bashkëshortes.
Në vendngjarje kanë shkuar efektivët e policisë duke neutralizuar shtetasin Sh. V., ndaj të cilit rëndojnë akuzat për veprat penale “Dhuna në familje” dhe “Mbajtja pa leje dhe prodhimi i armëve, armëve shpërthyese dhe i municionit”.
Po ashtu, policia thotë se gjatë kontrollit të banesës së 65-vjeçarit, u gjetën dhe sekuestruan një mjet prerës thikë, një armë zjarri kallashnikov, 4 krëhra dhe municion luftarak. Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Tiranë, për veprime të mëtejshme.
